100-வது டெஸ்டில் சதமடித்து டேவிட் வார்னர் சாதனை!

டெஸ்ட் கிரிக்கெட்டில் தனது 100-வது டெஸ்டை விளையாடும் டேவிட் வார்னர், தென்னாப்பிரிக்காவுக்கு எதிராக சதமடித்து சாதனைப் பட்டியலில் இணைந்துள்ளார்.

தென்னாப்பிரிக்க அணி ஆஸ்திரேலியாவுக்குச் சுற்றுப்பயணம் செய்து 3 டெஸ்டுகளில் விளையாடுகிறது. முதல் டெஸ்டில் இரு நாள்களில் தோல்வியடைந்தது. இந்நிலையில் மெல்போர்னில் நடைபெற்று வரும் பாக்ஸிங் டே டெஸ்டில் டாஸ் வென்ற ஆஸ்திரேலிய அணி, ஃபீல்டிங்கைத் தேர்வு செய்தது. 

இந்த டெஸ்டிலும் தென்னாப்பிரிக்க பேட்டர்கள் மோசமாக பேட்டிங் செய்ததால் முதல் இன்னிங்ஸில் தெ.ஆ. அணி 68.4 ஓவர்களில் 189 ரன்களுக்கு அனைத்து விக்கெட்டுகளையும் இழந்தது. முதல் நாள் முடிவில் ஆஸ்திரேலிய அணி 12 ஓவர்களில் 1 விக்கெட் இழப்புக்கு 45 ரன்கள் எடுத்தது. வார்னர் 32, லபுஷேன் 5 ரன்களுடன் களத்தில் இருந்தார்கள். 

இந்நிலையில் இன்று அபாரமாக விளையாடிய டேவிட் வார்னர், 144 பந்துகளில் 8 பவுண்டரிகளுடன் சதமடித்தார். இதன்மூலம் 100-வது டெஸ்டில் சதமடித்த 10-வது வீரர் என்கிற பெருமையைப் பெற்றுள்ளார். 

ஆஸ்திரேலிய அணி 73 ஓவர்களில் 2 விக்கெட் இழப்புக்கு 298 ரன்கள் எடுத்துள்ளது. வார்னர் 177, ஸ்மித் 84 ரன்களுடன் களத்தில் உள்ளார்கள்.