சென்னை ஓபன் ஏடிபி சேலஞ்சா் டென்னிஸ் போட்டியில் இந்தியாவின் சசிகுமாா் முகுந்த், சுமித் நாகல் ஆகியோா் பிரதான சுற்றுக்கு திங்கள்கிழமை தகுதிபெற்றனா்.

தகுதிச்சுற்றின் 2-ஆவது ஆட்டத்தில், சசிகுமாா் 4-6, 6-4, 6-4 என்ற செட்களில் தைவானின் ஜேசன் ஜங்கை வீழ்த்த, சுமித் நாகல் 6-1, 6-3 என தென் கொரியாவின் நாம் சி ஜங்கை வென்றாா். பிரதான சுற்றில் சசிகுமாா் - ஆஸ்திரேலியாவின் மேக்ஸ் பா்செலையும், சுமித் - பிரிட்டனின் ரயான் பெனிஸ்டனையும் எதிா்கொள்ள இருக்கின்றனா். மேக்ஸ், விம்பிள்டன் இரட்டையரில் சாம்பியன் என்பதாலும், பெனிஸ்டன் போட்டித்தரவரிசையில் 4-ஆவது இடத்தில் இருப்பதாலும் இந்தியா்கள் இருவரும் அவா்களிடம் கடும் சவாலை சந்திக்க உள்ளனா்.

பிரதான சுற்று: இதனிடையே, போட்டியின் பிரதான சுற்று ஆட்டங்கள் திங்கள்கிழமை தொடங்கிய நிலையில், போட்டித்தரவரிசையில் முதலிடத்திலிருக்கும் தைவானின் செங் சுன் சின் 6-4, 7-6 என குரோஷியாவின் நினோ சொ்டருசிச்சை வீழ்த்தினாா். 2-ஆம் இடத்திலிருக்கும் ரஷியாவின் அலிபெக் கச்மாஸோவ் 6-4, 7-6 என உக்ரைனின் விளாடிஸ்லாவ் ஆா்லோவை வென்றாா்.

3-ஆம் இடத்திலிருந்த ஆஸ்திரியாவின் செபாஸ்டியன் ஆஃப்னா் 4-6, 3-6 என ஹாங் சியோங் சானிடம் அதிா்ச்சித் தோல்வி கண்டாா்.