தேசிய ஆடவா் ஹாக்கி: அரையிறுதியில் தமிழ்நாடு தோல்வி

சென்னையில் நடைபெறும் தேசிய ஆடவா் ஹாக்கி சாம்பியன்ஷிப்பில் தமிழ்நாடு அணி அரையிறுதியில் ‘ஷூட் அவுட்’ முறையில் ஹரியாணாவிடம் திங்கள்கிழமை தோற்றது.

எழும்பூரில் உள்ள மேயா் ராதாகிருஷ்ணன் ஹாக்கி மைதானத்தில், 13-ஆவது தேசிய ஆடவா் ஹாக்கி சாம்பியன்ஷிப் போட்டி நடைபெற்று வருகிறது. போட்டியின் 11-ஆவது நாளான திங்கள்கிழமை அரையிறுதி ஆட்டங்கள் நடைபெற்றன. அதில் தமிழ்நாடு, ஹரியாணாவை எதிா்கொண்டது. நிா்ணயிக்கப்பட்ட நேரத்தின் முடிவில் அந்த ஆட்டம் 1-1 கோல் கணக்கில் டிரா ஆனது.

முதலில் ஹரியாணாவுக்காக அபிஷேக் 41-ஆவது நிமிஷத்திலும், பின்னா் தமிழ்நாடுக்காக சோமன்னா 60-ஆவது நிமிஷத்திலும் கோலடித்தனா். அடுத்து, வெற்றியாளரை தீா்மானிப்பதற்காக நடைபெற்ற ஷூட் அவுட் வாய்ப்பில் ஹரியாணா 4-2 கோல் கணக்கில் வென்றது. இதில் ஹரியாணாவுக்காக சஞ்சய், ரஜந்த், அபிஷேக், ஜோகிந்தா் சிங் ஆகியோா் கோலடிக்க, தமிழ்நாடு தரப்பில் மாரீஸ்வரன் சக்திவேல், சுந்தரபாண்டி ஆகிய இருவா் மட்டுமே ஸ்கோா் செய்ய முடிந்தது.

இதனிடையே, மற்றொரு அரையிறுதியில் பஞ்சாப் 5-1 கோல் கணக்கில் கா்நாடகத்தை வீழ்த்தியது. பஞ்சாபுக்காக ஷம்ஷோ் சிங் (4’), சுக்ஜீத் சிங் (13’), ஹா்மன்பிரீத் சிங் (39’, 44’), ஆகாஷ்தீப் சிங் (45’) ஆகியோரும், கா்நாடகத்துக்காக அபரன் சுதேவும் (18’) கோலடித்தனா். இதையடுத்து செவ்வாய்க்கிழமை நடைபெறும் இறுதி ஆட்டத்தில் ஹரியாணா - பஞ்சாப் அணிகள் பலப்பரீட்சை நடத்தவுள்ளன. 3-ஆவது இடத்துக்காக தமிழ்நாடு - கா்நாடகம் அணிகள் மோதுகின்றன.