டிடிவி தினகரனின் ஆதரவு எம்.எல்.ஏ.க்கள் 18 பேரை நீக்கம் செய்திருப்பது சட்டப்படி செல்லாது என்று முன்னாள் சட்டப்பேரவை தலைவர்கள் கருத்து தெரிவித்துள்ளனர்.
முன்னாள் சட்டப்பேரவை தலைவர் சேடபட்டி முத்தையா: ஆளுநரைச் சந்தித்து எம்.எல்.ஏ.க்கள் மனு கொடுத்தார்கள் என்பதற்காக அவர்கள் மீது கட்சித் தாவல் சட்டத்தின் கீழ் நடவடிக்கை எடுக்க முடியாது. அரசியல் சட்டத்தின் 10-ஆவது அட்டவணையில் ஒரு சட்டப்பேரவை உறுப்பினரைத் தகுதி நீக்கம் செய்வதற்கான வழிமுறைகள் குறித்து தெளிவாகக் குறிப்பிடப்பட்டுள்ளது. அதன்படி 18 எம்.எல்.ஏ-க்களை நீக்கியிருப்பதற்காகச் சொல்லப்படும் காரணம் சரியானது இல்லை. இந்நடவடிக்கையில் பேரவைத் தலைவர் மட்டுமல்லாமல், முதல்வர், அரசு கொறடா ஆகியோர் நீதிமன்றத்தின் கண்டனத்துக்கு உள்ளாக நேரிடும்.
திமுக ஆட்சியில் பேரவைத் தலைவராக இருந்த ஆவுடையப்பன் கூறியது: எம்.எல்.ஏ.க்கள் கட்சித் தாவலே செய்யாதபோது, கட்சி தாவியதாக நடவடிக்கை எடுத்திருப்பது சரியானது இல்லை. எந்தக் கட்சி சின்னத்தின் சார்பில் தேர்ந்தெடுக்கப்பட்டனரோ, அந்தச் சின்னத்தின் எம்.எல்.ஏ.க்களாகத்தான் ஆளுநரிடம் மனு கொடுத்துள்ளனர். இதில் தவறு இல்லை. 
இதுபோன்ற நடவடிக்கையால் எடியூரப்பா வழக்கில் 7 எம்.எல்.ஏ.க்களை நீக்கியது செல்லாது என்று உச்ச நீதிமன்றம் தீர்ப்பளித்துள்ளது. அதனால், பேரவைத் தலைவர் தனபாலின் உத்தரவுக்கு உயர்நீதிமன்றம் தடை விதிக்க வாய்ப்பு உள்ளது.
திமுக ஆட்சியில் பேரவைத் துணைத் தலைவராக இருந்த வி.பி.துரைசாமி கூறியது: 18 எம்.எல்.ஏ.-க்களை நீக்கியிருப்பது அரசியல் சட்டத்துக்கு முரணான செயல். இதுவரையிலான சுதந்திர வரலாற்றில் இதுபோன்ற தகுதி நீக்கம் நடந்தது இல்லை. பேரவைத் தலைவர் ஜனநாயகப் படுகொலை செய்துள்ளார். பேரவைத் தலைவரின் நடவடிக்கை நீதிமன்றத்தில் செல்லாது.