சென்னை: கட்சித் தாவல் தடைச் சட்டத்தின் கீழ் துணை முதல்வர் ஓ. பன்னீர்செல்வம் உட்பட 12 எம்எல்ஏக்கள் மீது நடவடிக்கை எடுக்கக் கோரி திமுக சார்பில் வழக்குத் தொடரப்பட்டுள்ளது.

தினகரன் அணியில் இணைந்து, முதல்வருக்கு எதிராக ஆளுநரிடம் மனு கொடுத்த 18 எம்எல்ஏக்களும், கட்சித் தாவல் தடைச் சட்டத்தின் கீழ் தகுதி நீக்கம் செய்யப்பட்டனர்.

இந்த நிலையில், தினகரன் அணியில் இணைந்த 18 எம்எல்ஏக்களும் தகுதி நீக்கம் செய்யப்படும் போது, தனி அணியாக பிரிந்து செயல்பட்ட ஓ.பன்னீர்செல்வம் உள்ளிட்டோர் மீது அவைத் தலைவர் நடவடிக்கை எடுக்காதது ஏன் என்று அதிமுக அம்மா அணியின் துணைப் பொதுச் செயலர் டிடிவி தினகரன், திமுக செயல் தலைவர் ஸ்டாலின் உள்ளிட்டோர் கேள்வி எழுப்பியிருந்தனர்.

இந்த நிலையில், இதே கருத்தை வலியுறுத்தி, ஓ. பன்னீர்செல்வம் உட்பட 12 எம்எல்ஏக்களை பதவி நீக்கம் செய்யக் கோரி திமுக கொறடா சக்ரபாணி சென்னை உயர் நீதிமன்றத்தில் இன்று மனு ஒன்றை தாக்கல் செய்தார்.

அதில், தமிழக சட்டப்பேரவையில் நடைபெற்ற நம்பிக்கை வாக்கெடுப்பின் போது முதல்வருக்கு எதிராக ஓ. பன்னீர்செல்வம் உட்பட 12 பேரும் வாக்களித்தனர். இது தொடர்பாக வெற்றிவேல், ரெங்கசாமி உள்ளிட்ட எம்எல்ஏக்கள் அவைத் தலைவரிடம் மனு கொடுத்தும் எந்த நடவடிக்கையும் இல்லை. எனவே, கட்சித்தாவல் தடைச் சட்டத்தின் கீழ் ஓ. பன்னீர்செல்வம் உட்பட  12 பேரையும் பதவி நீக்கம் செய்ய வேண்டும் என்று கோரப்பட்டுள்ளது.

இந்த மனுவை சென்னை உயர் நீதிமன்றம் அவசர வழக்காக புதன்கிழமை விசாரணைக்கு எடுத்துக் கொள்கிறது.