நாடு முழுவதும் உள்ள உயர் கல்வி நிறுவனங்கள் அவர்களுடைய அங்கீகார தர நிலையை, கல்வி நிறுவன இணையதளத்தின் முகப்புப் பக்கத்தில் வெளியிட வேண்டும் என பல்கலைக்கழக மானியக் குழு (யுஜிசி)அறிவுறுத்தியுள்ளது.
இதுதொடர்பாக அனைத்துப் பல்கலைக்கழகத் துணைவேந்தர்களுக்கும் யுஜிசி அண்மையில் அனுப்பியுள்ள சுற்றறிக்கை:- 
உயர் கல்வியின் தரத்தை மேம்படுத்த மத்திய அரசு பல்வேறு நடவடிக்கைகளை எடுத்து வருகிறது. அதன் ஒரு பகுதியாக, உயர் கல்வி நிறுவனங்கள் குறித்த உண்மையான தகவல்கள், மாணவர்களையும், பெற்றோரையும் சென்று சேர வேண்டும் என்பதை முக்கியமாகக் கொண்டு செயல்பட்டு வருகிறது. 
அதன்படி, அனைத்து உயர் கல்வி நிறுவனங்களும் தங்களுடை ய அங்கீகார தர நிலையை அல்லது இன்னமும் அங்கீகாரம் பெறவில்லை என்ற தகவலை அனைவருக்கும் தெரியும் வகையில் கல்லூரி இணையதளத்தில் முகப்புப் பக்கத்தில் வெளியிட வேண்டும். தகுதி இருந்தும், அங்கீகாரம் பெற விண்ணப்பிக்காத விவரமும் வெளியிடப்பட வேண்டும் எனத் தெரிவிக்கப்பட்டுள்ளது.