ஆண்களுக்கு நிகராக பெண்களுக்கு சம ஊதியம் என்பது கானல் நீராகவே உள்ளது என்று மாநிலங்களவை திமுக குழுத் தலைவர் கனிமொழி கூறியுள்ளார்.
இதுதொடர்பாக வியாழக்கிழமை அவர் வெளியிட்ட அறிக்கை:
சரிபாதி பெண்கள் வாழும் நாட்டில் 33 சதவீத இடஒதுக்கீட்டுக்காக இன்னும் போராடத்தான் வேண்டியுள்ளது. சமூகமும், அரசும் வேலைக்குச் செல்லும் பெண்கள் எதிர்கொள்ளும் பிரச்னைகளைச் சற்று தள்ளி நின்றே வேடிக்கைப் பார்க்கின்றன.
செவ்வாய்க்கிரகத்துக்கு செயற்கைக்கோள் அனுப்பும் 21 -ஆம் நூற்றாண்டில்தான் பெண் சிசுக் கொலைகளும், வரதட்சிணைக் கொடுமைகளும், பாலியல் வன்கொடுமைகளும் தொடர்கதையாக உள்ளன. ஒரே வேலைக்கு சம ஊதியம் என்பது இன்னும் கானல் நீராகத்தான் உள்ளது. இனிவரும் நாள்களாவது மகளிருக்கான தேவைகள் நிறைவேறும் நாள்களாக இருக்கட்டும் என கனிமொழி தெரிவித்துள்ளார்.