உள்ளாட்சித் தேர்தலை உள்நோக்கத்துடன் தமிழக அரசு தடுத்து வருவதாக திமுக தலைவர் மு.க.ஸ்டாலின் குற்றம்சாட்டியுள்ளார்.
 இது தொடர்பாக சனிக்கிழமை அவர் வெளியிட்ட அறிக்கை: மக்களவைத் தேர்தல் மற்றும் வாக்காளர் பட்டியல் சரிபார்ப்பு என்று புதிய காரணங்களைக் கண்டுபிடித்து, தமிழகத்தில் தற்போது உள்ளாட்சித் தேர்தலை நடத்த முடியாத சூழல் உள்ளது என்று உச்சநீதிமன்றத்தில் அதிமுக அரசு பதில் மனு தாக்கல் செய்துள்ளது. இது கண்டனத்துக்குரியது.
 உள்ளாட்சித் தேர்தலை நடத்தக் கூடாது என்று தமிழ்நாடு தேர்தல் ஆணையமும், அதிமுக அரசும் உயர்நீதிமன்றத்திலும், உச்சநீதிமன்றத்திலும் மாறி மாறி கங்கணம் கட்டிக் கொண்டு பதில் மனுக்களைத் தாக்கல் செய்து, கடந்த இரண்டரை ஆண்டுகளுக்கும் மேலாக தமிழகத்தில் உள்ளாட்சி ஜனநாயகத்தை அடியோடு பாழ்படுத்தி வருகின்றன. அதிமுக அரசின் விருப்பத்துக்கு ஏற்ப செயல்பட்டு, முதல்வர் எடப்பாடி பழனிசாமி மற்றும் உள்ளாட்சித் துறை அமைச்சர் எஸ்.பி. வேலுமணியின் கட்டுப்பாட்டில் இயங்குவதற்கு தமிழகத்தில் ஒரு தனி மாநிலத் தேர்தல் ஆணையம் தேவையா என்ற கேள்வி எழுந்துள்ளது.
 மாநில தேர்தல் ஆணையருக்கு, தேர்தலை நடத்துவதற்கு தேவையான உதவிகளைச் செய்ய வேண்டிய அரசு, கால அவகாசம் கேட்டுக்கொண்டே இருப்பது தோல்வி பயத்தின் உச்சகட்டம்.
 எனவே, உள்ளாட்சித் தேர்தலை நடத்த விடாமல் அதிமுக அரசு தொடர்ந்து நடத்தி வரும் ஒத்துழையாமை இயக்கத்தை, மாநில தேர்தல் ஆணையர் தானாகவே முன் வந்து உயர்நீதிமன்றத்திலும், உச்சநீதிமன்றத்திலும் தெரிவித்து உள்ளாட்சித் தேர்தலை நடத்த நடவடிக்கை எடுக்க வேண்டும் என்று அவர் கூறியுள்ளார்.