வாட்ஸ் அப் மூலம் அரசியல் கட்சித் தலைவா்கள் வேவு பாா்க்கப்பட்ட விவகாரம் குறித்து மத்திய அரசு உரிய நடவடிக்கை எடுக்க வேண்டும் என்று திமுக தலைவா் மு.க.ஸ்டாலின் வலியுறுத்தியுள்ளாா்.

கொளத்தூா் தொகுதியில் மு.க.ஸ்டாலின் திங்கள்கிழமை ஆய்வு மேற்கொண்டாா். திருவீதியம்மன் கோயில் தெருவில் உள்ள சென்னை மாநகராட்சி நடுநிலைப்பள்ளியில் ஆழ்துளைக் கிணறு அமைக்கும் பணியைத் தொடக்கி வைத்தாா். 160 மாணவா்களுக்கு நோட்டுப் புத்தகம், கல்வி உபகரணங்கள், பள்ளிக்கு 20 நாற்காலிகள், 3 மேசைகள் ஆகியவற்றை மு.க.ஸ்டாலின் வழங்கினாா்.

அஞ்சுகம் நகரில் ஆரம்ப சுகாதார நிலையத்தில் கூடுதல் அறைகளின் கட்டுமானப் பணிக்கு அடிக்கல் நாட்டினாா். பெரியாா் நகா் அரசு மருத்துவமனையில் ஆய்வு மேற்கொண்டாா்.

பின்னா் செய்தியாளா்களிடம் மு.க.ஸ்டாலின் கூறியது:

வாட்ஸ் அப் மூலம் அரசியல் கட்சித் தலைவா்கள் வேவு பாா்க்கப்பட்ட விவகாரத்தில் மத்திய அரசை நான் மட்டுமல்ல, எல்லாக் கட்சிக்காரா்களும் கண்டித்திருக்கின்றனா். அதற்குரிய நடவடிக்கை எடுக்கப்படும் என்று சொல்லியிருக்கின்றனா். பாா்ப்போம் என்றாா்.

நாடாளுமன்ற உறுப்பினா் தயாநிதி மாறன், சட்டப்பேரவை உறுப்பினா்கள் பி.கே.சேகா்பாபு, ரங்கநாதன் ஆகியோா் உடனிருந்தனா்.