தருமபுரி மாவட்டம், ஈச்சம்பாடி அணைக்கட்டில் இருந்து வரும் 25 -ஆம் தேதி முதல் தண்ணீர் திறந்து விட முதல்வர் பழனிசாமி உத்தரவிட்டுள்ளார். 
இதுகுறித்து, அவர் திங்கள்கிழமை வெளியிட்ட அறிவிப்பு: தருமபுரி மாவட்டம் ஈச்சம்பாடி அணைக்கட்டின் வலது மற்றும் இடது வாய்க்கால்களில் தண்ணீர் திறந்து விடும்படி விவசாயிகள் கோரிக்கை விடுத்துள்ளனர். அவர்களது வேண்டுகோளை ஏற்று, ஈச்சம்பாடி அணைக்கட்டின் வலது மற்றும் இடதுபுற வாய்க்கால்களில் வரும் 25-ஆம் தேதி முதல் தண்ணீர் திறந்து விட உத்தரவிட்டுள்ளேன். இதனால், தருமபுரி மற்றும் கிருஷ்ணகிரி மாவட்டங்களில் உள்ள 6 ஆயிரத்து 250 ஏக்கர் நிலங்கள் பாசன வசதி பெறும். 
விவசாயிகள் நீரைச் சிக்கனமாகப் பயன்படுத்தி உயர் மகசூல் பெற வேண்டும் என்று தனது அறிவிப்பில் முதல்வர் பழனிசாமி கேட்டுக் கொண்டுள்ளார்.