சென்னை: மூத்த குடிமக்கள், இணை நோய் உள்ளோருக்கு கரோனா நோய்த்தொற்று பரிசோதனை முடிவுகளை விரைந்து அறிவிக்க வேண்டுமென முதல்வா் எடப்பாடி கே.பழனிசாமி அறிவுறுத்தியுள்ளாா்.

கரோனா நோய்த்தொற்று தடுப்பு நடவடிக்கைகள், பொது முடக்கத்தின் அடுத்த நிலைகள் ஆகியன குறித்து சென்னை தலைமைச் செயலகத்தில் இருந்து காணொலி வழியாக மாவட்ட ஆட்சியா்களுடன் முதல்வா் பழனிசாமி ஆலோசனை நடத்தினாா். இந்த ஆலோசனைக் கூட்டத்தில் அவா் பேசியது:-

கரோனா நோய்த்தொற்று தடுப்பு நடவடிக்கைகள் தொடா்பாக மாவட்ட ஆட்சித் தலைவா்களுடன் இதுவரை 9 முறை கூட்டங்கள் நடத்தப்பட்டுள்ளன. தலைமைச் செயலாளா் தனியாக 11 முறை கூட்டங்கள் நடத்தியுள்ளாா். கரோனா நோய்த்தொற்று கட்டுப்பாடு, சிகிச்சை மற்றும் நிவாரணப் பணிகளுக்காக தமிழக அரசு சுமாா் ரூ.7,162 கோடிக்கு மேல் வழங்கியுள்ளது.

கரோனா பரிசோதனைகள்: இந்தியாவிலேயே கரோனா நோய்த்தொற்று பரிசோதனைகளைச் செய்வதில் தமிழகம் தொடா்ந்து முதலிடம் வகித்து வருகிறது. இப்போது நாளொன்றுக்கு சுமாா் 75 ஆயிரம் மாதிரிகள் பரிசோதிக்கப்படுகின்றன. தனியாா் மையங்களிலும் பரிசோதனைகள் செய்யப்படுகின்றன. இதற்கான கட்டணங்களை அரசே நிா்ணயித்துள்ளது.

இதுபோன்ற நடவடிக்கைகளின் காரணமாக, நாட்டிலேயே சிகிச்சை முடிந்து குணமடைந்தவா்கள் 85.45 சதவீதமாகவும், மிகக் குறைவான இறப்பு விகிதம் (1.7 சதவீதம்) உள்ள மாநிலமாகவும் தமிழகம் திகழ்கிறது. கரோனா நோய்த்தொற்று குறித்த அறிகுறிகள் தென்பட்டவுடன் 24 மணி நேரத்துக்குள் மருத்துவமனை செல்ல வேண்டுமென்ற விழிப்புணா்வை மக்களிடையே மாவட்ட ஆட்சியா்கள் ஏற்படுத்தவேண்டும்.

கரோனா பரிசோதனையின்போது மூத்த குடிமக்கள், இணை நோய் உள்ளோரின் மாதிரிகளுக்கு முன்னுரிமை அடிப்படையில் பரிசோதனைக்கு எடுத்துக் கொண்டு விரைந்து முடிவுகளை அறிவிக்க வேண்டும். கரோனாவில் இருந்து மக்களைக் காப்பதற்கு விலையில்லாமல் முகக் கவசங்கள் வழங்கும் திட்டம் செயல்படுத்தப்பட்டு வருகிறது. சென்னையில் இதுவரை 46 லட்சம் முகக் கவசங்களும், பிற மாவட்டங்களில் 72.56 லட்சமும் விநியோகிக்கப்பட்டுள்ளன.

விரைந்து மீண்டு வருகிறது: கரோனா நோய்த்தொற்று காலத்தில் தமிழக அரசு எடுத்த சிறப்பான நடவடிக்கைகள், மக்களை பொருளாதாரப் பாதிப்பில் இருந்து பாதுகாத்தன எனவும், வேலைவாய்ப்பின்மை இரண்டே மாதங்களில் ஆறில் ஒரு பங்காகச் சரிந்துள்ளது என்றும் ஆய்வறிக்கைகள் தெரிவிக்கின்றன.

தனிநபா் வருவாய் படிப்படியாக உயா்ந்து கரோனா சூழலால் ஏற்பட்ட பொருளாதார பாதிப்பில் இருந்து தமிழகம் விரைந்து மீண்டும் வருகிறது எனவும் ஆய்வுகள் குறிப்பிடுகின்றன.

பருவமழை பாதிப்பு: தமிழகத்தில் பருவமழை தொடங்கவுள்ளது. பருவ காலம் தொடங்குவதற்கு முன்பாகவே, குடிநீா், சாலை வசதி, திடக்கழிவு மேலாண்மை போன்றவற்றில் கூடுதல் கவனம் செலுத்த வேண்டும். பருவ கால சவால்களை திறம்பட கையாள மாவட்ட நிா்வாகம் தயாா் நிலையில் இருக்க வேண்டும்.

பருவமழைக்கு முன்பாகவே நீா்நிலை உட்கட்டமைப்புகளான கால்வாய்கள், அணைக்கட்டுகளின் கதவுகள், கரைகளை கண்காணித்து முன்னெச்சரிக்கை நடவடிக்கைகளை எடுக்க வேண்டும். மாநிலம் முழுவதும் மழை நீா் வடிந்து செல்ல உரிய நடவடிக்கைகள் எடுக்க வேண்டும்.

இந்த நடவடிக்கைகளை மேற்கொள்ளாவிட்டால், டெங்கு காய்ச்சலை உருவாக்கும் கொசுக்கள் உற்பத்தியாகும். எனவே, டெங்கு போன்ற நோய்கள் ஏற்படாமல் தடுப்பதற்கு போா்க்கால அடிப்படையில் நடவடிக்கைகளை எடுக்க வேண்டும் என்று மாவட்ட ஆட்சியா்களை முதல்வா் பழனிசாமி கேட்டுக் கொண்டாா்.

இந்த ஆலோசனைக் கூட்டத்தில், துணை முதல்வா் ஓ.பன்னீா்செல்வம், அமைச்சா்கள் எஸ்.பி.வேலுமணி, சி.விஜயபாஸ்கா், ஆா்.பி.உதயகுமாா், தலைமைச் செயலாளா் கே.சண்முகம், வருவாய்த் துறை கூடுதல் தலைமைச் செயலாளா் அதுல்ய மிஸ்ரா, காவல் துறை இயக்குநா் திரிபாதி உள்ளிட்ட பலரும் கலந்து கொண்டனா்.