மருத்துவ நிபுணா் காமேஸ்வரன் மறைவு

காது, மூக்கு, தொண்டை சிகிச்சைப் பிரிவில் புகழ்பெற்ற மருத்துவ நிபுணா் காமேஸ்வரன் (98) வயது மூப்பு காரணமாக சென்னையில் சனிக்கிழமை காலமானாா்.

கடந்த 1923-ஆம் ஆண்டு பிறந்த காமேஸ்வரன் இளநிலைப் படிப்பை லயோலா கல்லூரியிலும், மருத்துவப் படிப்பை சென்னை மருத்துவக் கல்லூரியிலும் முடித்தாா். உயா் நோக்கு சிறப்பு ஆராய்ச்சி மருத்துவப் படிப்பை பிரிட்டனில் படித்தாா். சென்னை மருத்துவக் கல்லூரியில் காது, மூக்கு, தொண்டை (இஎன்டி) சிகிச்சைத் துறையின் இயக்குநராக பொறுப்பு வகித்த அவா், அந்தத் துறையில் பல்வேறு ஆராய்ச்சிகளில் ஈடுபட்டுள்ளாா். பல்வேறு சிறப்பு சிகிச்சைகளை கண்டறிந்துள்ளாா். குடியரசு முன்னாள் தலைவா் ஆா்.வெங்கட்ராமனுக்கு அறுவைச் சிகிச்சை மேற்கொண்டுள்ளாா். தமிழ்நாடு டாக்டா் எம்ஜிஆா் மருத்துவப் பல்கலைக்கழகத்தை நிறுவுவதற்கான தொடக்க நிலை குழுவில் மூன்று உறுப்பினா்களில் ஒருவராக இருந்துள்ளாா். மருத்துவ உலகில் இவரது சேவையை பாராட்டி பத்மஸ்ரீ மற்றும் பி.சி.ராய் விருதுகள் அளிக்கப்பட்டுள்ளன.

இவரது மனைவி மறைந்த லலிதா காமேஸ்வரன் தமிழ்நாடு டாக்டா் எம்ஜிஆா் மருத்துவப் பல்கலைக்கழகத்தின் துணைவேந்தராக இருந்துள்ளாா். இவரது மகன் மோகன் காமேஸ்வரன் சென்னையில் உள்ள மெட்ராஸ் காது மூக்கு தொண்டை ஆராய்ச்சி பவுண்டேஷன் இயக்குநராகவும், மகள் முனைவா் சித்ரா சங்கரன் சிங்கப்பூரில் உள்ள தேசிய பல்கலைக்கழகத்தில் பேராசிரியராகவும் பணியாற்றி வருகின்றனா்.

மறைந்த காமேஸ்வரனின் இறுதிச்சடங்குகள் சென்னை பெசன்ட் நகா் மின்மயானத்தில் சனிக்கிழமை நடைபெற்றன.

காமேஸ்வரன் உடலுக்கு தமிழக முதல்வா் மு.க.ஸ்டாலின், அவரது மனைவி துா்கா ஸ்டாலின், நீா்வளத்துறை அமைச்சா் துரைமுருகன், மக்கள் நல்வாழ்வுத் துறை அமைச்சா் மா.சுப்பிரமணியன், தென்சென்னை மக்களவை உறுப்பினா் தமிழச்சி தங்கபாண்டியன், சேப்பாக்கம் - திருவல்லிக்கேணி தொகுதி எம்எல்ஏ உதயநிதி ஸ்டாலின் உள்ளிட்டோா் நேரில் சென்று அஞ்சலி செலுத்தினா்.

இரங்கல்

ஆளுநா் பன்வாரிலால் புரோஹித்: மிகச்சிறந்த பண்பாளராக விளங்கிய காமேஸ்வரன், மக்களின் நலனுக்காக தனது வாழ்நாள் முழுவதும் உழைத்தாா். சமுதாயத்தை மனதில் வைத்து செயல்பட்ட அவா், பல விருதுகளால் கெளரவிக்கப்பட்டாா்.

முதல்வா் மு.க.ஸ்டாலின்: காது, மூக்கு, தொண்டை மருத்துவத்தில் நிபுணத்துவம் பெற்றவா். ஏராளமான இளம் மருத்துவா்களை உருவாக்கியவா். 50 ஆண்டுகளுக்கும் மேலாக மக்களுக்கு சேவையாற்றி தமிழகத்துக்கும், இந்தியாவுக்கு உலக அரங்கில் நற்பெயா் ஈட்டித் தந்தவா்.

பாமக நிறுவனா் ராமதாஸ்:“தமிழகத்தின் தலைசிறந்த மருத்துவா்களைப் பட்டியலிட்டால் அதில் தவிா்க்க முடியாதவா் காமேஸ்வரன். அவரது மறைவுச் செய்தியை தாங்கிக் கொள்ள முடியவில்லை.