நாமக்கல்: சட்டப்பேரவைத் தேர்தலையொட்டி நாமக்கல் தொகுதியில் புதன்கிழமை துணை ராணுவத்தினரின் அணிவகுப்பு நடைபெற்றது.

தமிழக சட்டப்பேரவை தேர்தல் ஏப்ரல் 6-ஆம் தேதி நடைபெறுகிறது. இதனையொட்டி பல்வேறு பாதுகாப்பு பணிகளுக்காக மத்திய துணை ராணுவத்தினர், எல்லை பாதுகாப்பு படை வீரர்கள் மாவட்ட வாரியாக அனுப்பி வைக்கப்பட்டுள்ளனர். நாமக்கல் தொகுதிக்கு உத்தரகண்ட் மாநிலத்தில் இருந்து 90 படைவீரர்கள் வந்திருந்தனர். அவர்கள் நாமக்கல்- துறையூர் சாலையில் உள்ள நகராட்சி திருமண மண்டபத்தில் கடந்த 5 நாள்களாக தங்கி இருந்தனர். 

இந்த நிலையில் நாமக்கல் நகரப் பகுதியில் புதன்கிழமை துணை ராணுவத்தினரின் அணிவகுப்பு நிகழ்ச்சி நடைபெற்றது. இதனை மாவட்ட கூடுதல் காவல் கண்காணிப்பாளர் ரவிக்குமார் தொடங்கி வைத்தார். துணைக் காவல் கண்காணிப்பாளர் காந்தி மற்றும் காவலர்கள் 50-க்கும் மேற்பட்டோர் கலந்து கொண்டனர். 

இந்த துணை ராணுவத்தினர், காவல்துறையினர் அணிவகுப்பானது நாமக்கல் காவல் நிலையத்தில் தொடங்கி திருச்சி சாலை, அண்ணாசாலை, பரமத்தி சாலை, கோட்டை சாலை, பேருந்து நிலைய சாலை வழியாக மீண்டும் காவல் நிலையத்தை வந்தடைந்தது.