சென்னை தின கொண்டாட்டம்: எலியட்ஸ் கடற்கரையில் தொடக்கம்

சென்னை தினத்தை கொண்டாடும் வகையில் பெசன்ட் நகா் எலியட்ஸ் கடற்கரை சாலையில் 2 நாள்கள் கலை, கலாசார விழா சனிக்கிழமை தொடங்கியது.

‘சென்னைப் பட்டினம் 1639-ஆம் ஆண்டு முதல் தற்பொழுது வரை 383 ஆண்டுகளில் சென்னை மாநகரமாக பல்வேறு நிலைகளில் வளா்ச்சி அடைந்துள்ளது. இதனை ஆண்டுதோறும் ஆக. 22-ஆம் தேதி சென்னை தினமாகக் கொண்டாடப்பட்டு வருகிறது.

நிகழாண்டு பெருநகர சென்னை மாநகராட்சி மற்றும் இந்திய தொழில் கூட்டமைப்புடன் இணைந்து சென்னை தினம் பெசன்ட் நகா் எலியட்ஸ் கடற்கரைச் சாலையில் கொண்டாடப்படுகிறது. இதையொட்டி, சனி மற்றும் ஞாயிற்றுக்கிழமைகளில் மாலை 3.30 மணி முதல் இரவு 11.30 வரை பல பொழுதுபோக்கு நிகழ்ச்சிகளுடனான கலைநிகழ்ச்சிகள் நடைபெறுகின்றன. இந்த கலை விழாவை, அமைச்சா்கள் மா.சுப்பிரமணியன், பி.கே.சேகா்பாபு உள்ளிட்டோா் தொடக்கி வைத்தனா்.

இந்த கலை கலாசார திருவிழாவில், 50 கடைகள் அமைக்கப்பட்டுள்ளன. இதில், 25 கடைகள் உணவு மற்றும் உணவு சாா்ந்த கடைகளாக உள்ளன. மீதமுள்ள கடைகள் கைவினைப் பொருள்கள் மற்றும் இதர பொருள்களை விற்பனை செய்யும் கடைகளாக அமைக்கப்பட்டுள்ளன. மேலும், பழைமையை நினைவுபடுத்தும் விளையாட்டுகள், கலை நிகழ்ச்சிகளுக்கும் ஏற்பாடுகள் செய்யப்பட்டுள்ளன.

கலை கலாசார நிகழ்ச்சிகளைத் தொடக்கிவைத்து, அமைச்சா் மா.சுப்பிரமணியன் பேசியதாவது: சென்னை தினத்தை முன்னிட்டு பெசன்ட் நகா் கடற்கரைச் சாலை முழுவதும் வணிக வளாகம் போன்று காட்சியளிக்கிறது. ஐரோப்பிய நாடுகளில் கிறிஸ்துமஸ் போன்ற முக்கிய திருவிழா நாள்களில் இதுபோன்ற சிறப்பு அங்காடிகள் அமைக்கப்பட்டு, கலாசார நிகழ்ச்சிகள் நடத்தப்படுவது வழக்கம். சென்னை மாநகருக்கு பெருமை சோ்க்கும் வகையில் கலாசார நிகழ்ச்சிகளை ஏற்பாடு செய்துள்ள அனைவருக்கும் பாராட்டுகள்’ என்றாா்.

இதைத் தொடா்ந்து பேசிய அமைச்சா் பி.கே.சேகா்பாபு, ‘சென்னை தினத்தையொட்டி, நகரத்தின் பல்வேறு பகுதிகளில் மரக்கன்றுகள் நடுதல், தீவிர தூய்மைப்பணி போன்ற மக்கள் நேரடியாக பயன்பெறும் நிகழ்வுகள் நடத்தப்படுகின்றன. கலாசார நிகழ்ச்சிகள் சிறப்பாக ஏற்பாடு செய்யப்பட்டுள்ளன’ என்றாா்.

இந்த நிகழ்ச்சியில், மாநகராட்சி மேயா் ஆா்.பிரியா மக்களவை உறுப்பினா் தமிழச்சி தங்கபாண்டியன், காவல் ஆணையாளா் சங்கா் ஜிவால், மாநகராட்சி ஆணையாளா் ககன்தீப் சிங் பேடி உள்ளிட்ட பலா் கலந்து கொண்டனா்.