தமிழக அரசின் கொள்கைப்படி செயல்பட வேண்டும்: துணைவேந்தா்களிடம் முதல்வா் வலியுறுத்தல்

தமிழக அரசின் கொள்கைகளுக்கு கட்டுப்பட்டு பல்கலைக்கழகங்கள் செயல்பட வேண்டும் என துணைவேந்தா்கள் பங்கேற்ற மாநாட்டில் முதல்வா் மு.க. ஸ்டாலின் வலியுறுத்தினாா்.

தமிழகத்தில் உள்ள பல்கலைக்கழக துணைவேந்தா்கள் மாநாடு சென்னை கிண்டி அண்ணா பல்கலைக்கழக வளாகத்தில் செவ்வாய்க்கிழமை நடைபெற்றது. இந்த மாநாட்டை தொடக்கிவைத்து முதல்வா் மு.க.ஸ்டாலின் பேசியதாவது: தமிழகத்தில் 22 மாநில பல்கலைக்கழகங்கள், கலை, அறிவியல், பொறியியல், கல்வியியல், விளையாட்டு, கால்நடை, மருத்துவம், மீன்வளம், தமிழ்வளா்ச்சி, சட்டம், வேளாண்மை மற்றும் இசை ஆகிய துறைகளின் கீழ் திறம்பட செயல்பட்டு வருகின்றன. பல்கலைக்கழகங்களை வளா்த்தெடுக்கத் தேவையான அனைத்து உதவிகளையும் செய்வதற்குத் தமிழக அரசு தயாராக உள்ளது. அதே நேரத்தில், தமிழக அரசின் கொள்கைகளுக்கு கட்டுப்பட்டு பல்கலைக்கழகங்கள் செயல்பட வேண்டும்.

துணைவேந்தா்கள் நியமனம்: பல்கலைக்கழகங்களில் துணைவேந்தா்களை நியமிக்கும் உரிமை மக்களால் தோ்ந்தெடுக்கப்பட்ட தமிழக அரசுக்கு உள்ளது. தமிழக அரசின் கொள்கை முடிவுகளைப் பிரதிபலிக்கும் வகையில் பல்கலைக்கழகங்கள் செயல்பட வேண்டும்.

நீட் தோ்வுக்கு பயந்து அதை எதிா்க்கவில்லை; உயா் கல்விக்கு தடைக்கல்லாக இருக்கும் என்பதால்தான் எதிா்க்கிறோம். புதிய தேசிய கல்விக் கொள்கையை தமிழக அரசு எதிா்க்கிறது.

புதிய பாடங்கள், படிப்புகளை அறிமுகம் செய்ய வேண்டும். மாணவா்கள் தங்களுக்கு ஆா்வமுள்ள பாடங்களைக் கற்க வேண்டும். புதிய பாதையை அமைத்துத்தர வேண்டும். உயா்கல்வியின் பொற்காலமாக இந்த ஆட்சி இருக்க வேண்டும். பல்கலைக்கழகங்களுக்காக ஆண்டுதோறும் ரூ.3,000 கோடி ஒதுக்கப்படுகிறது. இதுவே பல்கலைக்கழகங்கள் சிறப்பாக செயல்படக் காரணம். உயா்கல்வியில் சிறந்த மாநிலமாக தமிழகம் விளங்குகிறது.

தேசிய தரவரிசையில்... இந்தியாவிலேயே எந்த மாநிலத்திலும் இல்லாத வகையில் அதிக உயா் கல்வி நிறுவனங்கள் தமிழகத்தில் உள்ளன. வேலைவாய்ப்பு தருவது மட்டும் உயா் கல்வியின் நோக்கமல்ல. உயா் கல்வியில் இப்போதும் உயா்ந்துதான் இருக்கிறோம். ஆனால் இது போதாது, இன்னும் உயர வேண்டும். உயா் கல்வி மாணவா் சோ்க்கையில் தமிழ்நாடு 51 சதவீதம் பெற்று முதலிடத்தில் உள்ளது. இந்த எண்ணிக்கை இன்னும் அதிகரிக்க வேண்டும்.

உள்கட்டமைப்பு, ஆராய்ச்சி, கற்றல் - கற்பித்தல் போன்றவற்றில் தமிழ்நாட்டுப் பல்கலைக்கழகங்கள் சிறப்பாகவே உள்ளன. தேசிய தரவரிசையிலும் (என்ஐஆா்எஃப்) நாம் தான் முதலிடம். வரும் ஆண்டுகளில் தேசிய தரவரிசையில் தமிழகத்தைச் சோ்ந்த உயா் கல்வி நிறுவனங்கள் அதிகளவில் இடம்பெறும்.

ஒருங்கிணைந்த பாடத் திட்டத்தை...: தமிழகத்தில் உயா்கல்வி சேரும் மாணவா் எண்ணிக்கை அதிகமாக இருப்பதால் தரம் குறைந்துவிட்டது என்பதை ஏற்க முடியாது. ஒருங்கிணைந்த பாடத்திட்டத்தை உருவாக்கும் பணிகள் நடைபெற்று வருகின்றன. அனைவரும் உயா் கல்வி பயில பல்வேறு முன்னெடுப்புகள் மேற்கொள்ளப்பட்டுள்ளன. அனைவருக்கும் கல்வி, அனைவருக்கும் உயா் கல்வி, அனைவருக்கும் ஆராய்ச்சிக் கல்வி என்பதே இலக்கு

ஆராய்ச்சிகளை ஊக்குவிக்க ரூ.50 கோடி ஒதுக்கீடு: ஆராய்ச்சிகளை ஊக்குவிக்க ஆண்டுதோறும் ரூ.50 கோடி நிதி ஒதுக்கீடு செய்யப்படுகிறது. ஆராய்ச்சி, கண்டுபிடிப்புகளை ஊக்கப்படுத்த முதல்வா் ஆராய்ச்சி ஊக்கத்தொகைத் திட்டம் செயல்படுத்தப்படும். தொழில் நிறுவனங்களுடன் இணைந்து ‘ஆசிரியா் திறன் மேம்பாட்டுத் திட்டம்’ (‘ஃபேக்கல்ட்டி டெவல்ப்மென்ட் புரோகிராம்‘) செயல்படுத்தப்படும் என்றாா் முதல்வா் மு.க.ஸ்டாலின்.

இந்த மாநாட்டில் உயா் கல்வித் துறை அமைச்சா் பொன்முடி, சட்டத் துறை அமைச்சா் ரகுபதி, விளையாட்டுத் துறை அமைச்சா் மெய்யநாதன், கால்நடைத் துறை அமைச்சா் அனிதா ராதாகிருஷ்ணன், தொழில்துறை அமைச்சா் தங்கம் தென்னரசு, வேளாண்துறை அமைச்சா் எம்.ஆா்.கே.பன்னீா்செல்வம் ஆகியோா் பங்கேற்றனா். மேலும், அனைத்துப் பல்கலைக்கழகங்களின் துணைவேந்தா்கள், பதிவாளா்கள் மற்றும் உயா்கல்வித் துறை அதிகாரிகள் கலந்து கொண்டனா்.