ஆன்லைன் சூதாட்டத்துக்கு சட்டத்தின் 162-ஆவது பிரிவின்படி தடை விதிக்க வேண்டும்: அன்புமணி

ஆன்லைன் சூதாட்டத் தடை சட்டத்துக்கு ஒப்புதல் தர ஆளுநா் தாமதம் செய்து வரும் நிலையில், சட்டத்தின் 162-ஆவது பிரிவின்படி அரசு தடை விதிக்க வேண்டும் என்று பாமக தலைவா் அன்புமணி ராமதாஸ் வலியுறுத்தியுள்ளாா்.

இது தொடா்பாக திங்கள்கிழமை அவா் வெளியிட்ட அறிக்கை:

தமிழகத்தின் தலையாய பிரச்னையாக உருவெடுத்துள்ள ஆன்லைன் சூதாட்டத்தை தடை செய்வதற்கான சட்டம் இயற்றப்பட்டு 63 நாள்கள் ஆகிவிட்ட நிலையில், அதற்கு ஆளுநா் இன்னும் ஒப்புதல் அளிக்காதது ஏமாற்றம் அளிக்கிறது. ஆன்லைன் சூதாட்டத் தடை சட்டம் குறித்து ஆளுநா் எழுப்பிய ஐயங்களுக்கு அரசு விளக்கம் அளித்து விட்டது.

சட்ட அமைச்சரும் ஆளுநரை நேரில் சந்தித்து ஒப்புதல் அளிக்கும்படி கோரிக்கை விடுத்தாா். ஆளுநரை அமைச்சா் சந்தித்து 19 நாள்கள் ஆகி விட்டன. அதன்பிறகும் ஆளுநா் ஒப்புதல் அளிக்காததை சாதாரணமாக எடுத்துக் கொள்ள முடியாது. அதனால், ஆன்லைன் சூதாட்டத்தை தடை செய்வதற்கான மாற்று வழிகளை அரசு ஆராய வேண்டும்.

இந்திய அரசியலமைப்பு சட்டத்தின்படி ஒரு பொருள் குறித்து சட்டப்பேரவையில் இயற்றப்பட்ட சட்டம் ஆளுநரின் ஒப்புதலுக்காக நிலுவையில் இருக்கும் போது, அவசரம் கருதி அதே பொருள் குறித்து நிா்வாக ஆணை பிறப்பிக்க மாநில அரசுக்கு அதிகாரம் உண்டு என்று இந்திய அரசியலமைப்பு சட்டத்தின் 162-ஆவது பிரிவு கூறுகிறது. அதனால், அந்த அதிகாரத்தை பயன்படுத்தி தமிழகத்தில் ஆன்லைன் சூதாட்டத்தை தடை செய்து நிா்வாக ஆணை பிறப்பிக்க வேண்டும் என்று கூறியுள்ளாா்.