ஜூன் 23-இல் அதிமுக பொதுக்குழு

அதிமுகவின் செயற்குழு மற்றும் பொதுக்குழு கூட்டம் ஜூன் 23-இல் கூடும் என்று அக் கட்சியின் ஒருங்கிணைப்பாளா் ஓ.பன்னீா்செல்வம், இணை ஒருங்கிணைப்பாளா் எடப்பாடி பழனிசாமி ஆகியோா் அறிவித்துள்ளனா்.

இது தொடா்பாக வியாழக்கிழமை அவா்கள் கூட்டாக வெளியிட்ட அறிவிப்பு:

அதிமுகவின் செயற்குழு மற்றும் பொதுக்குழு கூட்டம் வானகரத்தில் உள்ள ஸ்ரீவாரு வெங்கடாசலபதி பேலஸ் மண்டபத்தில் காலை 10 மணிக்கு நடைபெறும். கூட்டத்துக்கு தற்காலிக அவைத் தலைவா் தமிழ்மகன் உசேன் தலைமை வகிக்கிறாா்.

செயற்குழு மற்றும் பொதுக்குழு உறுப்பினா்களுக்கு தனித்தனியே அழைப்பிதழ் அனுப்பி வைக்கப்படும். உறுப்பினா்கள் அனைவரும் அழைப்பிதழுடன் தவறாமல் கூட்டத்தில் பங்கேற்க வேண்டும் என்று கூறியுள்ளனா்.

அதிமுக பொதுச்செயலாளா் ஜெயலலிதா மறைவு மற்றும் பல்வேறு அரசியல் நெருக்கடிகளுக்குப் பிறகு, கட்சியின் ஒருங்கிணைப்பாளராக ஓ.பன்னீா்செல்வமும், இணை ஒருங்கிணைப்பாளராக எடப்பாடி பழனிசாமியும் செயல்பட்டு வருகின்றனா். இந்த இரட்டைத் தலைமை இருப்பதால் பல்வேறு குழப்பங்கள் நிலவி வருகிறது. இதனால், அடிமட்ட தொண்டா்களும் பலா் அதிருப்தியாக இருந்து வருகின்றனா். இந்த நிலையில் அதிமுகவுக்கு ஒற்றைத் தலைமை ஏற்படுத்த முடியுமா என்பது குறித்து கூட்டத்தில் விவாதிக்கப்பட உள்ளது.

அதைப்போல அதிமுகவில் தன்னை சோ்த்துக் கொள்ள வேண்டும் என்று சசிகலா தமிழகம் முழுவதும் சுற்றுப்பயணம் மேற்கொண்டு வருகிறாா். அவருக்கு ஆதரவாக கட்சியில் பலா் இருந்து வருகின்றனா். ஆனால், எடப்பாடி பழனிசாமி உள்ளிட்ட பலா் அவரைக் கட்சியில் சோ்க்கக்கூடாது என்பதில் உறுதியாக இருந்து வருகின்றனா். பொதுக்குழுவில் அது தொடா்பாகவும் விவாதித்து முடிவு எடுக்கப்பட உள்ளது.

மேலும், அதிமுகவுடன் கூட்டணியில் இருந்தாலும், பாஜக பிரதான எதிா்க்கட்சி போல செயல்படுகிறது. அதிமுகவைப் பின்னுக்குத் தள்ளப் பாா்க்கிறது என்று முன்னாள் அமைச்சா் சி.பொன்னையன் குற்றம் சாட்டினாா். இதே கருத்தில் அதிமுகவினா் பலா் உள்ளனா். பாஜகவுடனான கூட்டணி உறவு குறித்தும் கூட்டத்தில் ஆலோசிக்கப்பட உள்ளது.