பாலாற்றின் குறுக்கே புதிய தடுப்பணை: ஆந்திர அரசுக்கு தமிழகம் எதிா்ப்பு

சென்னை: உச்சநீதிமன்றத்தில் வழக்குகள் நிலுவையில் உள்ள சூழலில், பாலாற்றின் குறுக்கே தடுப்பணை கட்டும் செயல்களை மேற்கொள்ளக் கூடாது என்று ஆந்திரத்தை தமிழக அரசு வலியுறுத்தியுள்ளது.

இது குறித்து நீா்வளத் துறை அமைச்சா் துரைமுருகன் செவ்வாய்க்கிழமை வெளியிட்ட அறிக்கை:

1892-ஆம் ஆண்டின் ஒப்பந்தப்படி, பாலாறு தொடா்புடைய மாநிலங்களின் முன் அனுமதியில்லாமல் எந்த அணை கட்டுமானத்தையோ அல்லது நீரைத் தடுப்பதற்கான கட்டுமானத்தையோ, நீரைத் திருப்புவதற்கும், தேக்குவதற்குமான எந்தவொரு செயலையும் மேற்கொள்ள முடியாது. இந்த ஒப்பந்தம் படுகை சம்பந்தப்பட்ட மாநிலங்களைக் கட்டுப்படுத்தும். மேலும், இந்த ஒப்பந்தம் செல்லுபடியாகும் என 2018-ஆம் ஆண்டு உச்சநீதிமன்றம் அளித்த தீா்ப்பில் தெளிவாகக் குறிப்பிடப்பட்டுள்ளது.

இந்தச் சூழ்நிலையில், ஆந்திர அரசு தன்னிச்சையாக ஒரு புதிய அணையைக் கட்ட முயற்சிப்பது 1892-ஆம் ஆண்டின் ஒப்பந்தத்தை மீறுவதாகும். மேலும், உச்சநீதிமன்றம் குறிப்பிட்ட கருத்துக்கு முற்றிலும் மாறுபட்ட செயலாகும். இதற்கு முன்னா் சித்தூா் மாவட்டம் கணேஷபுரத்தில் ஆந்திர அரசு தன்னிச்சையாக ஓா் அணையைக் கட்ட முயற்சித்தபோது அந்தச் செயலை ஆட்சேபித்து தமிழ்நாடு அரசின் சாா்பில் உச்சநீதிமன்றத்தில் 2006-ஆம் ஆண்டு வழக்கு தாக்கல் செய்யப்பட்டது.

இந்த வழக்கில் இரு மாநில சாட்சியாளா்களின் குறுக்கு விசாரணை 2018-ஆம் ஆண்டு முடிவடைந்தது. வழக்கின் இறுதி விசாரணை நடக்கவுள்ளது. இதனிடையே, ஆந்திர அரசு பாலாற்றின் குறுக்கே ஏற்கெனவே அமைக்கப்பட்ட தடுப்பணைகளின் உயரத்தை அதிகரித்திருப்பதை எதிா்த்து ஒரு சிவில் வழக்கு உச்சநீதிமன்றத்தில் தொடரப்பட்டுள்ளது. இந்த வழக்கும் உச்சநீதிமன்றத்தில் நிலுவையில் உள்ளது.

இவ்வாறு இரண்டு அசல் வழக்குகளும் உச்சநீதிமன்றத்தில் நிலுவையில் இருக்கும்போது தன்னிச்சையாக பாலாற்றில் ஆந்திர அரசு ஒரு புதிய அணையைக் கட்ட முயற்சிப்பதும், அதற்காக நிதி ஒதுக்கீடு செய்திருப்பதும் உச்சநீதிமன்றத்தை அவமதிப்பதாகத்தான் கருத வேண்டும். இந்தச் செயல் இரு மாநிலங்களின் நட்புக்கு ஏற்ல்ல.

மேலும், கூட்டாட்சிக்கு எதிரானது. எனவே, உச்சநீதிமன்றத்தில் வழக்குகள் நிலுவையில் இருக்கும்போது அணை கட்டுவது போன்ற எந்தவித செயல்களையும் இரு மாநிலங்களின் நலன் கருதி மேற்கொள்ளக் கூடாது எனத் தெரிவித்துள்ளாா் அவா்.