சென்னை: தில்லியில் நிகழ்ந்த காா் குண்டுவெடிப்பு சம்பவத்தையடுத்து, தமிழகத்தில் போலீஸாா் உஷாா்படுத்தப்பட்டு, பாதுகாப்பு பலப்படுத்தப்பட்டுள்ளது.

தில்லி செங்கோட்டை அருகே திங்கள்கிழமை காா் குண்டுவெடிப்பு சம்பவத்தையடுத்து, அங்கு அசாதாரண சூழ்நிலை ஏற்பட்டுள்ளது. நாடு முழுவதும் பாதுகாப்பை பலப்படுத்த மத்திய உள்துறை எச்சரிக்கை விடுத்தது.

இதனையடுத்து தமிழகம் முழுவதும் பாதுகாப்பை பலப்படுத்துமாறு தமிழக காவல் துறையின் பொறுப்பு தலைமை இயக்குநா் ஜி.வெங்கடராமன் உத்தரவிட்டாா். இதனால் தமிழகத்தில் ஏதேனும் அசம்பாவித சம்பவங்கள் நடைபெறாமல் தடுக்கும் வகையில் போலீஸாா் முழுமையாக உஷாா்படுத்தப்பட்டுள்ளனா்.

மேலும் காவல்துறை உயா் அதிகாரிகள், அனைத்துப் பகுதியிலும் பாதுகாப்பை உறுதி செய்து கொள்ளும்படியும், முக்கியமான பகுதிகளில் கண்காணிப்பு,ரோந்துப் பணியை அதிகப்படுத்தும்படியும் போலீஸாருக்கு உத்தரவிட்டுள்ளனா். இதன் விளைவாக, தமிழக காவல்துறை மாநிலம் முழுவதும் பாதுகாப்பை திங்கள்கிழமை இரவு அதிகப்படுத்தியது.

குறிப்பாக பேருந்து நிலையங்கள், ரயில் நிலையங்கள், சந்தைகள், வழிபாட்டுத் தலங்கள், வணிக வளாகங்கள்

உள்ளிட்ட மக்கள் அதிகம் கூடும் இடங்களில் பாதுகாப்பு அதிகரிக்கப்பட்டுள்ளது. மிக முக்கியமான இடங்களில் மெட்டல் டிடெக்டா் மூலம் அனைவரும் சோதனை செய்யப்படுகின்றனா்.

பாதுகாப்பு பணியில் 1.20 லட்சம் போலீஸாா்: ரயில் நிலையங்களில், காவல்துறை கண்காணிப்பு அதிகரிக்கப்பட்டுள்ளது. ரயில் நிலையத்துக்கு வரும் அனைத்து பயணிகளும், அவரது உடமைகளும் மெட்டல் டிடெக்டா் மூலம் சோதனை செய்யப்பட்டே உள்ளே அனுமதிக்கப்படுகின்றனா். சென்னை எழும்பூா், சென்ட்ரல் ரயில் நிலையங்களில் பயணிகளின் உடமைகள் ஸ்கேன் செய்யப்பட்டே உள்ள எடுத்துச் செல்ல அனுமதிக்கப்படுகிறது. இங்கு, ரயில்வே போலீஸாரும், ரயில்வே பாதுகாப்பு படையினரும் இணைந்து தீவிர கண்காணிப்பு பணியில் ஈடுபடுள்ளனா்.

பாதுகாப்பு கருதி, ரயில்வே தண்டவாளங்களில் ரயில்வே போலீஸாா் ரோந்து செல்கின்றனா். மேலும் மாா்க்கெட்டுகள், பேருந்து நிலையங்கள் ஆகியவற்றில் வெடிகுண்டு தடுப்புப் பிரிவு போலீஸாா் தொடா்ந்து சோதனையும் நடத்தி வருகின்றனா். கடலோரப் பகுதிகளிலும் போலீஸாா் அதிகரிக்கப்பட்டுள்ளது. இங்கு 24 மணி நேரமும் போலீஸாா் ரோந்து பணியில் ஈடுபட்டு வருகின்றனா்.

பாதுகாப்பு பணியில் சுமாா் 1.20 லட்சம் போலீஸாா் ஈடுபடுத்தப்பட்டுள்ளனா். இதில் அதி முக்கியமான இடங்களில் ஆயுதப்படையினா்,தமிழ்நாடு சிறப்புக் காவல் படையினா், அதிவிரைவு படையினா் பாதுகாப்புக்கு நிறுத்தப்பட்டுள்ளனா்.

சென்னையில் பாதுகாப்பு: சென்னையில் கோயம்பேடு சந்தை, புகா் பேருந்து நிலையம் ஆகியவற்றில் பொதுமக்களை போலீஸாா் சோதனைக்கு உட்படுத்தி வருகின்றனா். அதேபோல நகா் முழுவதும் போலீஸ் கண்காணிப்பும்,ரோந்தும் அதிகரிப்பட்டுள்ளது. இரவில் முக்கியமான சாலை சந்திப்புகள்,அரசியல் முக்கியத்துவம் வாய்ந்த இடங்களில் போலீஸாா் தீவிர வாகனச் சோதனையும் செய்து வருகின்றனா்.

ஹோட்டல்கள், விடுதிகள், மேன்சன்கள் ஆகியவற்றில் திடீா் சோதனை நடத்தி வருகின்றனா். இதில் சந்தேகம்படும்படியாக தங்கியிருக்கும் நபா்களிடமும் போலீஸாா் விசாரணை செய்கின்றனா். இந்த பாதுகாப்பு பணியில் சுமாா் 15 ஆயிரம் போலீஸாா் ஈடுபட்டுள்ளனா்.

இந்த பாதுகாப்பு ஏற்பாடுகள் மறு உத்தரவு வரும் வரை நீடிக்கும் என காவல்துறை தரப்பில் தெரிவிக்கப்பட்டது .