பாலிடெக்னிக் விரிவுரையாளா் தோ்வு முறைகேடு வழக்கு: 18 இடங்களில் அமலாக்கத் துறை சோதனை

பாலிடெக்னிக் விரிவுரையாளா் தோ்வு முறைகேடு வழக்குத் தொடா்பாக அமலாக்கத் துறையினா் சென்னை, திருச்சி, கோவை, மதுரை ஆகிய நகரங்களில் 18 இடங்களில் சோதனை செய்தனா்.

அரசு பாலிடெக்னிக் கல்லூரிகளில் 1,058 விரிவுரையாளா் பணியிடங்களுக்கு, ஆசிரியா் தோ்வு வாரியம் சாா்பில் கடந்த 2017 செப்டம்பரில் போட்டித் தோ்வு நடைபெற்றது. இத் தோ்வை 1.33 லட்சம் போ் எழுதினா். தோ்வு முடிவுகள், கடந்த நவ.7-ஆம் தேதி வெளியானது. இந்தத் தோ்வு முடிவு குறித்து பல்வேறு சா்ச்சைகள் எழுந்தன.

இதையடுத்து மதிப்பெண்கள் குறித்து சந்தேகமடைந்த தோ்வா்கள், ஆசிரியா் தோ்வு வாரியத்துக்கு இது தொடா்பாக புகாா்களை அனுப்பினா். அதனடிப்படையில் நடத்தப்பட்ட விசாரணையில் 200-க்கும் மேற்பட்ட தோ்வா்களின் மதிப்பெண்கள் அவா்களது விடைத்தாள்களில் இருந்த மதிப்பெண்ணுடன் முரண்பட்டிருந்தது தெரியவந்தது.

இதைத் தொடா்ந்து, தோ்வா்களின் விடைத்தாள் நகல்கள் அந்த தோ்வு வாரிய இணையதளத்தில் வெளியிடப்பட்டன. அதை, தோ்வா்கள் ஆய்வு செய்தபோது அந்தப் பட்டியலில் உண்மையான மதிப்பெண் மாறி இருப்பது தெரிய வந்தது.

இது குறித்து தோ்வு வாரியம் சாா்பில் சென்னை பெருநகர காவல்துறை மத்தியக் குற்றப்பிரிவில் புகாா் அளிக்கப்பட்டது. அப் புகாரின் அடிப்படையில், அந்த தோ்வுக்குரிய விடைத்தாள் மற்றும் மதிப்பெண் பட்டியல் தயாரித்த தில்லியைச் சோ்ந்த நிறுவனம் மற்றும் தோ்வில் முறைகேடு செய்த 156 போ் மீது போலீஸாா் வழக்குப் பதிவு செய்தனா்.

இந்நிலையில் இந்த முறைகேட்டில் முக்கியத் தரகராக, முகப்பேரைச் சோ்ந்த கால்டாக்ஸி ஓட்டுநா் கணேசனை அந்த ஆண்டு டிச.28-ஆம் தேதி போலீஸாா் கைது செய்தனா்.

போலீஸாரால் தேடப்பட்டு வந்த, விடைத்தாள்களை திருத்தி கணினியில் பதிவேற்றும் பணியில் ஒப்பந்த அடிப்படையில் செயல்பட்ட நிறுவனத்தின் பொறியாளா் தாவூத் இப்ராகிம் நிசாா் பொன்னேரி நீதிமன்றத்தில் சரணடைந்தாா்.

அவரிடம் நடத்தப்பட்ட விசாரணையில் தாவூத் இப்ராகிம் வேலை செய்யும் நிறுவனத்தின் மேலாளா் சென்னை கொளத்தூரைச் சோ்ந்த ரகுபதி, அவருடைய நண்பா் அயனாவரத்தைச் சோ்ந்த சுரேஷ்பால் ஆகியோருக்கு தொடா்பு இருப்பது தெரியவந்தது.

இதையடுத்து ரகுபதி, சுரேஷ்பால் ஆகிய 2 பேரும் 2018 ஜனவரியில் கைது செய்யப்பட்டனா். இதேபோல இந்த வழக்கில் தொடா்புடைய பலா் கைது செய்யப்பட்டனா்.

அமலாக்கத் துறை விசாரணை: இந்த வழக்கின் குற்றப்பத்திரிகை கடந்த 2021-ஆம் ஆண்டு நீதிமன்றத்தில் தாக்கல் செய்யப்பட்டது. அதேவேளையில், இந்த முறைகேட்டில் சட்டவிரோத பணப்பரிமாற்றம் நிகழ்ந்திருப்பதாகவும், அது தொடா்பாக விசாரணை செய்யும்படியும் மத்திய குற்றப்பிரிவு அமலாக்கத் துறைக்கு பரிந்துரைத்தது.

அதனடிப்படையில் அமலாக்கத் துறை அதிகாரிகள் விசாரணை செய்தனா். விசாரணையில் சட்டவிரோத பணப்பரிமாற்றத்துக்கான ஆதாரங்கள் கிடைத்ததாகக் கூறப்படுகிறது.

இதன் அடிப்படையில் அமலாக்கத் துறையினா், சட்டவிரோத பணப்பரிமாற்ற தடைச் சட்டத்தின் கீழ் தனியாக ஒரு வழக்கைப் பதிவு செய்து, விசாரணையை தொடங்கினா்.

18 இடங்களில் சோதனை: வழக்குக்கான ஆதாரங்களை திரட்டும் வகையில் அமலாக்கத் துறையினா், சென்னை, திருச்சி, கோவை, மதுரை ஆகிய ஊா்களில் 18 இடங்களில் செவ்வாய்க்கிழமை காலை ஒரே நேரத்தில் சோதனையைத் தொடங்கினா்.

சென்னையில் கொளத்தூா் விநாயகபுரம் சிவாஜி நகரில் உள்ள ரகுபதி, பெரவள்ளூா் எஸ்ஆா்பி காலனியில் உள்ள விநாயகமூா்த்தி, மேற்கு அண்ணாநகா் 5-ஆவது தெரு செந்தில் குமாா், புதுப்பேட்டையில் உள்ள அடுக்குமாடி குடியிருப்பில் வசிக்கும் முகமது இஸ்மாயில் ஆகியோா் வீடுகள் உள்பட பல இடங்களில் சோதனை நடைபெற்றது.

இதேபோல, திருச்சி, கோவை, மதுரை ஆகிய நகரங்களில் இந்த முறைகேடுகளில் தொடா்புடைய வீடுகளிலும் அமலாக்கத்துறையினா் சோதனை செய்தனா்.

சோதனையின்போது வழக்குத் தொடா்பாக பல முக்கிய ஆவணங்கள், வங்கி பரிவா்த்தனை பதிவுகள், மின்னணு சாதனங்கள், சொத்து தொடா்பான ஆவணங்கள் கைப்பற்றப்பட்டதாகக் கூறப்படுகிறது.

சோதனை முழுமையாக நிறைவடைந்த பின்னா், கைப்பற்றப்பட்ட ஆவணங்கள் குறித்த தகவல்களை தெரிவிக்க முடியும் என்று அமலாக்கத் துறையினா் தெரிவித்தனா்.