தென்காசி மாவட்டத்தில் நத்தம் பட்டா மாறுதலுக்கு விண்ணப்பங்களை இ.சேவை மையங்கள் மூலம் இணையவழியில் சமா்ப்பிக்கலாம் என மாவட்ட ஆட்சியா் ஏ.கே.கமல் கிஷோா் தெரிவித்தாா்.

இதுகுறித்து அவா் வெளியிட்ட செய்திக்குறிப்பு: தமிழகத்தில் நத்தம் இணையவழி பட்டா மாறுதலுக்கு விண்ணப்பிக்கும் புதிய இ.சேவை வசதிகள் தொடங்கி வைக்கப்பட்டுள்ளது. இப் புதிய சேவையின் மூலம் தென்காசி மாவட்டத்தில் செங்கோட்டை, வீரகேரளம்புதூா், சிவகிரி, திருவேங்கடம், கடையநல்லூா் மற்றும் தென்காசி ஆகிய வட்டங்களில் நத்தம் பட்டா மாறுதல் விண்ணப்பங்களை பொது மக்கள் இ-சேவை மையம் மற்றும் இணையதளம் வழியாக விண்ணப்பிக்கலாம். நத்தம் பட்டா மாறுதல் விண்ணப்பங்கள் மீது இணையவழியில் நடவடிக்கை மேற்கொள்ளப்பட்டு நத்தம் பட்டா வழங்கப்படும்.

கிராம நத்தம் பகுதிகளுக்கான நத்தம் மனை பட்டாக்களை இணையதளத்தில் பதிவிறக்கம் செய்து கொள்ளலாம். இணையவழி பட்டா மாறுதல் திட்டம் நடைமுறைப்படுத்தப்பட்ட வட்டங்களில் இ-சேவை மையம் மற்றும் இணையவழியில் பெறப்படும் விண்ணப்பங்கள் மட்டுமே ஏற்றுக் கொள்ளப்படும் எனத் தெரிவித்துள்ளாா்.