தென்காசியில் ரூ.4 கோடியில் நலத்திட்ட உதவிகள்

தென்காசி மாவட்ட செய்தி மக்கள் தொடா்புத் துறை சாா்பில் தமிழ்நாடு அரசின் சாதனை விளக்க புகைப்பட கண்காட்சி மற்றும் நலத்திட்ட உதவிகள் வழங்கும் விழா தென்காசி இ.சி. ஈஸ்வரன் பிள்ளை அரசு ஆண்கள் மேல்நிலைப் பள்ளியில் வெள்ளிக்கிழமை நடைபெற்றது. மாவட்ட ஆட்சியா் ஏ.கே. கமல்கிஷோா் தலைமை வகித்தாா். எம்எல்ஏக்கள் எஸ். பழனிநாடாா், ஈ. ராஜா ஆகியோா் முன்னிலை வகித்தனா். தமிழக வருவாய் மற்றும் பேரிடா் மேலாண்மைத்துறை அமைச்சா் கேகேஎஸ்எஸ்ஆா்.ராமச்சந்திரன் சிறப்பு அழைப்பாளராகக் கலந்து கொண்டு செய்தி மக்கள் தொடா்புத்துறையின் தமிழ்நாடு அரசின் சாதனை விளக்க புகைப்பட கண்காட்சியை திறந்துவைத்தாா். மேலும், ரூ.3 கோடியே 74 லட்சத்து 16 ஆயிரம் செலவில் கட்டப்பட்டுள்ள முடிவுற்ற திட்டப் பணிகளை திறந்து வைத்து 485 பயனாளிகளுக்கு ரூ.4 கோடியே 3 லட்சத்து 45 ஆயிரம் மதிப்பிலான நலத்திட்ட உதவிகளை வழங்கிப் பேசினாா். விழாவில், மாவட்ட வருவாய் அலுவலா் கு. பத்மாவதி, வருவாய் கோட்டாட்சியா் லாவண்யா,திமுக தெற்கு மாவட்ட பொறுப்பாளா் வே. ஜெயபாலன், தென்காசி நகா்மன்றத் தலைவா் சாதிா், தென்காசி ஒன்றியக் குழுத் தலைவா் ஷேக் அப்துல்லா, ஆலங்குளம் ஊராட்சி ஒன்றியக்குழு தலைவா் திவ்யா மணிகண்டன், முன்னாள் மாவட்டச் செயலா் செல்லத்துரை, ஒன்றியச் செயலா்கள் ரவிசங்கா், திவான்ஒலி, சீனித்துரை, ஒன்றியக்குழு துணைத் தலைவா் கனகராஜ் முத்துப்பாண்டியன் ஆகியோா் கலந்துகொண்டனா். செய்தி மக்கள் தொடா்பு அலுவலா் இரா.இளவரசி வரவேற்றாா். உதவி மக்கள் தொடா்பு அலுவலா் ரா.ராமசுப்பிரமணியன் நன்றி கூறினாா்.