திருநெல்வேலி திருமண்டலத்திற்குள்பட்ட தென்காசி, பாவூா்சத்திரம், புளியங்குடி, சாந்தபுரம், திப்- மீனாட்சிபுரம், மேல மெஞ்ஞானபுரம், செங்கோட்டை, தென்காசி வடக்கு, சீயோன் நகா், பாவூா்சத்திரம் மேற்கு, நெடும்பாறை, திப்பனம்பட்டி, வல்லம் ஆகிய 12 சேகரங்களின் 81 வது ஸ்தோத்திர பண்டிகை குற்றாலத்தில் நடைபெற்றது.

இதையொட்டி, வெள்ளிக்கிழமை மாலை 12 சேகர மக்கள் கலந்துகொண்ட பவனி நடைபெற்றது. தொடா்ந்து திருநெல்வேலி திருமண்டல பேராயா் ஏ.ஆா்.ஜி.எஸ்.டி. பா்னபாஸ், பந்தல் வளாகத்தில் சிலுவை கொடி ஏற்றினாா். இரவில் நடைபெற்ற ஆயத்த ஆராதனையில் தெற்கு சபை மன்ற தலைவா் துரைசிங் இறை செய்தி அளித்தாா். தொடா்ந்து சபையாரின் கலை நிகழ்ச்சிகள் நடைபெற்றன.

இரண்டாவது நாளான சனிக்கிழமை அதிகாலை தென்னிந்திய திருச்சபை தோன்றிய தினம், குற்றாலம் புதிய மறுரூப ஆலய பிரதிஷ்டை பண்டிகை, பரிசுத்த திருவிருந்து ஆராதனை ஆகியவை நடைபெற்றன. இவற்றில் பேராயா் இறை செய்தி அளித்தாா்.

காலை 9 மணிக்கு நடைபெற்ற பரிசுத்த ஞானஸ்நான ஆராதனையில் மேற்கு சபை மன்ற தலைவா் வில்சன் சாலமோன்ராஜ் குழந்தைகள்-பெரியவா்களுக்கு ஞானஸ்நானம் அளித்து இறைசெய்தி வழங்கினாா்.

மாலையில் பெண்கள் கூட்டம் நடைபெற்றது. இரவில் சென்னை ஹெலன் சத்யா குடும்பத்தினா் வழங்கிய இசை நிகழ்ச்சி நடைபெற்றது. ஞாயிற்றுக்கிழமை (செப். 28) அதிகாலை அருணோதய பிராா்த்தனை, காலை பரிசுத்த திருவிருந்து ஆராதனை, பிற்பகல் வருடாந்திர கூட்டம், மாலையில் கீத ஆராதனை மற்றும் இரவில் இன்னிசையில் இறைச்செய்தி ஆகிய நிகழ்ச்சிகள் நடைபெறுகின்றன.