தென்காசி மாவட்டம், கீழப்பாவூரில் திருநெல்வேலி மேற்கு மாவட்ட திமுக சாா்பில் வணிகா்கள் , விவசாயிகள், பொதுமக்களிடம் கருத்துக் கேட்பு கூட்டம் புதன்கிழமை நடைபெற்றது.

கீழப்பாவூா் பேரூா் செயலா் ஜெகதீசன் தலைமை வகித்தாா். கீழப்பாவூா் வடக்கு ஒன்றியச் செயலா் பொன் செல்வன், கிழக்கு ஒன்றியச் செயலா் சிவன் பாண்டியன் ஆகியோா் முன்னிலை வகித்தனா்.

கூட்டத்தில் பங்கேற்ற வணிகா்கள், விவசாயிகள், அரிசி ஏற்றுமதி வாய்ப்பு ஏற்படுத்திட வேண்டும், கதா் உற்பத்தி நிலையம் அமைக்க வேண்டும், நீா் நிலைகள் பராமரிப்பு, விவசாய பொருள்களுக்காள வரியைக் கட்டுப்படுத்த வேண்டும் உள்ளிட்ட பல்வேறு கருத்துக்களை தெரிவித்தனா்.

தொடா்ந்து, முன்னாள் பேரவைத் தலைவரும், மேற்கு மாவட்ட பொறுப்பாளருமான ஆவுடையப்பன் பங்கேற்றுப் பேசினாா்.

முன்னாள் அமைச்சா் பூங்கோதை ஆலடி அருணா, முன்னாள் ஆலங்குளம் சட்டமன்ற உறுப்பினா் மனோஜ் பாண்டியன், நெல்லை தட்சணமாற நாடாா் சங்கத் தலைவா் ஆா்.கே. காளிதாசன், ஆலங்குளம் பேரவைத் தொகுதி பாா்வையாளா் கணேஷ் குமாா் ஆதித்தன், ஆலங்குளம் பேரூராட்சித் தலைவா் திவ்யா மணிகண்டன், ஒன்றியச் செயலா்கள் சிவக்குமாா், சமுத்திரபாண்டி, மாவட்ட சுற்றுச்சூழல் அணி அமைப்பாளா் பொன். அறிவழகன் உள்ளிட்ட பலா் கலந்து கொண்டனா்.