பங்குச் சந்தையில் ‘காளை’யின் பாய்ச்சல் தொடருமா?

புதுதில்லி: பங்குச் சந்தையைப் பொருத்தவரையிலும், கடந்த வாரம் ஒரு வரலாற்று வாரமாக அமைந்தது. மே 28-ஆம் தேதியுடன் முடிவடைந்த வாரத்தில், ஏற்கெனவே இதே பகுதியில் தெரிவித்திருந்தபடி, காளையின் ஆதிக்கம் மேலோங்கி இருந்தது. சுமாா் 3 மாதங்களுக்கும் மேலாக ஒருங்கிணைப்பு பெற்று வந்த சந்தை, இறுதியில் கடந்த வாரத்தின் இறுதி வா்த்தக தினமான வெள்ளிக்கிழமை தேசிய பங்குச் சந்தைக் குறியீட்டு எண்ணான நிஃப்டி புதிய உச்சத்தைப் பதிவு செய்துள்ளது.

கரோனா இரண்டாவது அலையின் அதீத தாக்கம் ஓரளவு குறைந்து வருகிறது. பாதிக்கப்படுவோா் எண்ணிக்கை கடந்த ஒரு வாரமாக வெகுவாகக் குறைந்து வருகிறது. இதற்கிடையே, இரண்டாவது அலையில் பாதிக்கப்பட்டுள்ள பல்வேறு துறைகளை ஆதரிப்பதற்கான மற்றொரு நிதி தொகுப்பு நம்பிக்கை, கா்ப்ரேட் நிறுவனங்களின் வருவாய், நோ்மறையான உலகளாவிய குறிப்புகள் ஆகியவை சந்தை ஏற்றத்துக்கு முக்கியக காரணிகளாக அமைந்தன. இருப்பினும் ரிசா்வ் வங்கியின் எச்சரிக்கை சமிக்ஞை, பங்குச் சந்தையில் சிறிதளவு பாதிப்பை ஏற்படுத்தியது மறுப்பதற்கில்லை.

மும்பை பங்குச் சந்தைக் குறியீட்டு எண்ணான சென்செக்ஸ் கடந்த வாரத்தில் மொத்தம் 882.40 புள்ளிகள் (1.75 சதவீதம்) உயா்ந்து 51,422.88 என்ற சாதனை அளவில் நிலைபெற்றுள்ளது. இதேபோல தேசிய பங்குச் சந்தைக் குறியீட்டு எண்ணான நிஃப்டி மொத்தம் 260.35 புள்ளிகள் (1.72 சதவீதம்) உயா்ந்து 15,435.65 என்ற புதிய உச்சத்தில் நிலைபெற்றுள்ளது.கடந்த வார இறுதியில் நிஃப்டி 15,469.65 வரை உயா்ந்து புதிய உச்சத்தைப் பதிவு செய்துள்ளது.

ஐடி நிறுவனங்கள், வங்கி, நிதி நிறுவனங்கள், ஆட்டோ, இன்ஃப்ரா நிறுவனப் பங்குகள் வெகுவாக ஏற்றம் பெற்று சந்தையில் காளையின் ஆதிக்கம் தொடர வழிவகுத்தன. அதே சமயம், மெட்டல் மற்றும் பாா்மா பங்குகளில் விற்பனை அழுத்தம் அதிகமாக இருந்தன. நடுத்தரப் பங்குகளை உள்ளடக்கிய மிட்கேப் குறியீடு 1.10 சதவீதம், சிறிய நிறுவனப் பங்குகளை உள்ளடக்கிய ஸ்மால் கேப் குறியீடு 1.83 சதவீதமும் ஏற்றம் பெற்றன. ஆனால், சென்செக்ஸ், நிஃப்டி பங்குகள் போல திறனுடன் செயல்படவில்லை. சந்தை உச்சத்தில் இருக்கும் இந்த நிலையில், இந்த வாரம் (மே 31-ஜூன் 4) எப்படி இருக்கும் என்று முதலீட்டாளா்கள், வா்த்தகா்கள், சந்தை வட்டாரத்தினரிடையே பெரும் எதிா்ப்பு இருந்து வருகிறது.

கரோனா இரண்டாவது அலையில் பாதிப்பு எண்ணிக்கை முந்தைய வாரங்களில் இருந்து வந்த 4 லட்சம் என்பது தற்போது 2 லட்சத்துக்கும் கீழே சரிந்துள்ளது. இது மாநில வாரியாக பொது முடக்கத்தில் தளா்வுகள் அறிவிக்கப்படும் என எதிா்பாா்க்கப்படுகிறது. இது பொருளாதார மீட்சிக்கான நம்பிக்கையை மேலும் உயா்த்தும். மேலும், கரோனா இரண்டாவது அலையின் போது பாதிக்கப்பட்டுள்ள துறைகளின் வளா்ச்சியைக் கருத்தில் கொண்டு புதிய நிதி தொகுப்பை மத்திய அரசு அறிவிக்கக்கூடும் என்ற எதிா்பாா்ப்பு இருந்து வருகிறது. இவை அனைத்தும் சந்தைக்கு சாதகமாக இருக்கக்கூடும். அப்போது சந்தை முந்தைய உச்சத்தைத் தாண்டி மேலும் வேகத்துடன் முன்னேறுவதற்கு அதிக வாய்ப்பு இருப்பதாக ஜியோஜித் நிதிச் சேவைகளின் ஆராய்ச்சிப் பிரிவுத் தலைவா் வினோத் நாயா் தெரிவித்துள்ளாா்.

இந்த வாரம் புதிய மாதத்தின் தொடக்கத்தை குறிக்கிறது. மேலும், பல முக்கியமான பொருளாதார தரவுகள் மற்றும் நிகழ்வுகள் வரிசையாக உள்ளன. முதல் காலாண்டிற்கான மொத்த உள்நாட்டு உற்பத்தியின் தரவு, தொழில் துறை உற்பத்தி தரவுகள் உள்ளிட்டவை இந்த வாரம் வெளியாகவுள்ளன. ஜூன் 1 முதல் மாதாந்திர வாகன மொத்த விற்பனை எண்ணிக்கையும் வெளியாகவுள்ளது. முக்கியமாக, வங்கி வட்டி விகிதம் தொடா்பான பணக் கொள்கைக் குழுவின் (எம்பிசி) மறு ஆய்வுக் கூட்டத்துக்கு திட்டமிடப்பட்டுள்ளது என்று ரிலிகோ் பங்குத் தரகு நிறுவனத்தின் துணைத் தலைவா் (ஆராய்ச்சி) அஜித் மிஸ்ரா தெரிவித்துள்ளாா். இவை அனைத்தும் வரவிருக்கும் வாரங்களில் சந்தையில் காளையின் எழுச்சியைத் தக்கவைக்க உதவும் என்று ரிலையன்ஸ் செக்யூரிட்டீஸின் தலைவா் பினோத் மோடி கூறியுள்ளாா்.

இவற்றுக்கிடையே, டாலருக்கு நிகாரன ரூபாயின் போக்கு, கச்சா எண்ணெய் விலை மற்றும் அந்நிய நிறுவன முதலீட்டாளா்களின் முதலீட்டுப் போக்கு உள்ளிட்டவையும் சந்தை முதலீட்டாளா்களால் கண்காணிக்கப்படும். இந்த வாரம் சந்தையில் எழுச்சி தொடா்வதற்கான வாய்ப்புகள் அதிகம் இருந்தாலும், எந்த நேரத்திலும் லாபப் பதிவும் வருவதற்கும் வாய்ப்பு உள்ளதாக சந்தை வல்லுநா்களின் ஒரு சாராா் கருதுகின்றனா். மொத்தத்தில் எம்பிசியின் வட்டி விகித முடிவு, பொருளாதாரத் தரவு அறிவிப்புகள், கரோனா பாதிப்பின் போக்கு மற்றும் உலகளாவிய சந்தைக் குறிப்புகள் ஆகியவையே இந்த வாரம் பங்குச் சந்தையை வழிநடத்தும் என்று ஆய்வாளா்கள் தெரிவித்துள்ளனா்.

தொழில்நுட்பப் பாா்வை

பங்குச் சந்தையில் முன்பேர வா்த்தகத்தில் ஜூன் மாத கான்ட்ராக்டுகள் பரபரப்பாக செயல்படத் தொடங்கியுள்ளது. இதையொட்டி, ஏற்றம், இறக்கம் மீண்டும் அதிகரிக்கக் தொடங்கும். ஒரு பக்கம் லாபப் பதிவு காரணமாக எச்சரிக்கையுடன் இருக்க வேண்டிய நிலை உள்ளது. மற்றொருபுறம் சந்தையில் காளையின் ஆதிக்கம் வீறு கொண்டுள்ளது.

இந்த நிலையில், தொழில்நுட்ப ரீதியாக சந்தையின் போக்கு குறித்து கோட்டக் செக்யூரிட்டீஸின் ஸ்ரீகாந்த் சௌகான் கூறுகையில், ‘தேசிய பங்குச் சந்தைக் குறியீட்டு எண்ணான நிஃப்டி 15,250-15,100 என்ற நிலை தூண் போன்று ஆதரவு அரணாக உள்ளது. இந்த நிலைக்கு மேலே சந்தை இருக்கும் பட்சத்தில் நிஃப்டி அடுத்து 16,000-16,200 வரை செல்லக்கூடும். எனவே, சந்தை சரிவின் போது பங்குகளை வாங்கலாம்’ என்கிறாா்.

ஆனந்த் ரதி பங்கு வா்த்தகத் தரகு நிறுவனத்தின் தொழில்நுட்பப் பிரிவு ஆராய்ச்சித் துணைத் தலைவா் மெஹுல் கோத்தாரி கூறுகையில், ‘இந்த மாதம் காளைக்கும், கரடிக்கும் இடையே கடுமையான போட்டி இருக்கும். நிஃப்டிக்கு 15,000 புள்ளிகளில் நல்ல ஆதரவு நிலை உள்ளது. 15,600 -15,800 என்பது இடைக்கால இடா்பாட்டு நிலையாக இருக்கும். இருப்பினும், காளையின் ஆதிக்கம் மேலும் அதிகரிக்கும்பட்சத்தில் நிஃப்டி 16,000 புள்ளிகளை நோக்கி முன்னேறுவதற்கு அதிக வாய்ப்பு உள்ளது’ என்கிறாா்.