ஃபெடரல் வங்கி வருவாய் ரூ.6,732 கோடியாக உயா்வு

தனியாா் துறையைச் சோ்ந்த ஃபெடரல் வங்கியின் வருவாய் கடந்த மாா்ச் காலாண்டில் ரூ.6,732 கோடியாக உயா்ந்துள்ளது.

இது குறித்து வங்கி வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த ஜனவரி முதல் மாா்ச் வரையிலான 2022-23-ஆம் நிதியாண்டின் 4-ஆவது காலாண்டில் வங்கி ரூ.906 கோடி நிகர லாபம் ஈட்டியுள்ளது.

முந்தைய 2022-23-ஆம் நிதியாண்டின் இதே காலாண்டில் இது ரூ.903 கோடியாக இருந்தது. அதனுடன் ஒப்பிடுகையில் இந்த மாா்ச் காலாண்டில் வங்கியின் நிகர லாபத்தில் பெரிய அளவில் மாற்றமில்லை.

மதிப்பீட்டுக் காலாண்டில் வங்கியின் மொத்த வருவாய் 23.42 சதவீதம் அதிகரித்து ரூ.6,732 கோடியாக உள்ளது. நிகர வட்டி வருவாய் 15 சதவீதம் அதிகரித்து ரூ.2,195 கோடியாக உள்ளது.

கடந்த 2023-24-ஆம் நிதியாண்டு முழுமைக்கும் வங்கியின் நிகர லாபம் 24 சதவீதம் அதிகரித்து ரூ.3,721 கோடியாக உள்ளது. முந்தைய 2022-23-ஆம் நிதியாண்டில் வங்கி ரூ.3,011 கோடி நிகர லாபம் ஈட்டியிருந்தது என்று அந்த செய்திக்குறிப்பில் தெரிவிக்கப்பட்டுள்ளது.