ஒரு நாள் லேசான சரிவுக்குப் பிறகு புதன்கிழமை பங்குச்சந்தை நேர்மறையாக முடிவடைந்தது. இதைத் தொடர்ந்து, மும்பை பங்குச்சந்தை குறியீட்டு எண் சென்செக்ஸ் 268 புள்ளிகள் உயர்ந்து நிலைபெற்றது.

உளகளாவிய சந்தைக் குறிப்புகள் கலவையாக இருந்தன. இருப்பினும், உள்நாட்டுச் சந்தை உற்சாகத்துடன் தொடங்கியது. ஆனால், சிறிது நேரத்திலேயே எதிர்மறையாகச் சென்றது. இந்நிலையில், சென்செக்ஸ் பட்டியலில் அதிகத் திறன் கொண்ட முன்னணி நுகர்பொருள் உற்பத்தி நிறுவனமான ஹிந்துஸ்தான் யுனிலீவர், மார்க்கெட் லீடர் ரிலையன்ஸ், முன்னணி ஐடி நிறுவனமான இன்போசிஸ் உள்ளிட்ட பங்குகளுக்கு வரவேற்பு கிடைத்ததால் சந்தை நேர்மறையாக முடிந்தது என்று பங்கு வர்த்தகத் தரகு நிறுவனங்கள் தெரிவித்தன.

சந்தை மதிப்பு உயர்வு: சந்தை மூல தன மதிப்பு ரூ.1.32 லட்சம் கோடி உயர்ந்து வர்த்தக இறுதியில் ரூ.415.94 லட்சம் கோடியாக இருந்தது. அந்நிய நிறுவன முதலீட்டாளர்கள் செவ்வாய்க்கிழமை ரூ.1,874.54 கோடிக்கு பங்குகளை விற்றிருந்த நிலையில், உள்நாட்டு நிறுவனங்கள் ரூ.3,548.97 கோடிக்கு பங்குகளை வாங்கியுள்ளது சந்தை புள்ளிவிவரத் தகவல்கள் மூலம் தெரியவந்தது.

சென்செக்ஸ் முன்னேற்றம்:

சென்செக்ஸ் 212.21 புள்ளிகள் கூடுதலுடன் 74,165.52-இல் தொடங்கி 73,860.33 வரை கீழே சென்றது. பின்னர், அதிகபட்சமாக 74,307.79 வரை மேலே சென்ற சென்செக்ஸ், இறுதியில் 267.75 புள்ளிகள் (0.36 சதவீதம்) உயர்ந்து 74,221.06-இல் முடிவடைந்தது. மும்பை பங்குச்சந்தையில் மொத்தம் வர்த்தகமான 3,948 பங்குகளில் 1,902 பங்குகள் ஆதாயப் பட்டியலிலும், 1,932 பங்குகள் வீழ்ச்சிப் பட்டியலிலும் இருந்தன. 114 பங்குகள் விலையில் மாற்றமின்றி நிலைபெற்றன.

21 பங்குகள் விலை உயர்வு:

சென்செக்ஸ் பட்டியலில் ஹிந்துஸ்தான் யுனிலீவர், ரிலையன்ஸ், இன்ஃபோசிஸ், ஏசியன் பெயின்ட், ஐடிசி, அல்ட்ராடெக் சிமென்ட் உள்பட 21 பங்குகள் ஆதாயப் பட்டியலில் இருந்தன. அதே சமயம், எஸ்பிஐ, ஜேஎஸ்டபிள்யூ ஸ்டீல், ஆக்ஸிஸ் வங்கி, ஐசிஐசிஐ வங்கி, டாடா ஸ்டீல், டாடா மோட்டார்ஸ் உள்பட 9 பங்குகள் மட்டுமே விலை குறைந்த பட்டியலில் இருந்தன.

நிஃப்டி 69 புள்ளிகள் முன்னேற்றம்: தேசிய பங்குச்சந்தையில் 50 முதல்தரப் பங்குகளை உள்ளடக்கிய நிஃப்டி வர்த்தக இறுதியில் 68.75 புள்ளிகள் (0.31 சதவீதம்) கூடுதலுடன் 22,597.80-இல் முடிவடைந்தது. வர்த்தகத்தின் போது 22,483.15 வரை கீழே சென்ற நிஃப்டி, பின்னர் அதிகபட்சமாக 22,629.50 வரை மேலே சென்றது. நிஃப்டி பட்டியலில் 33 பங்குகள் ஆதாயப் பட்டியலிலும் 17 பங்குகள் வீழ்ச்சிப் பட்டியலிலும் இருந்தன.