தொடா்ந்து மூன்றாவது முறையாக ரெப்போ விகிதத்தை ரிசா்வ் வங்கி குறைத்ததைத் தொடா்ந்து, இந்தியன் வங்கியும் வாடிக்கையாளா்கள் முதலீடு செய்யும் நிரந்தர வைப்பு நிதிக்கான வட்டி விகிதங்களைக் குறைத்துள்ளது.

இது குறித்து வங்கி வெளியிட்டுள்ள அறிக்கையில் தெரிவிக்கப்பட்டுள்ளதாவது:

பல்வேறு கால அளவுகளுக்கான நிரந்தர வைப்பு நிதிகளுக்கான வட்டி விகிதம் 50 அடிப்படை புள்ளிகள் வரை குறைக்கப்பட்டுள்ளது. இந்த புதிய விகிதங்கள் ஜூன் 9 முதல் அமலுக்கு வந்துள்ளன.

1 முதல் 2 ஆண்டுகள் கால அளவுக்கான நிரந்தர வைப்புக்கு ஆண்டுக்கு 7.1 சதவீதத்திற்கு பதிலாக இனி 6.6 சதவீத வட்டி வழங்கப்படும். 444 நாள்கள் வைப்பு நிதிக்கு, 7.15 சதவீதமாக இருந்த வட்டி இனி 6.9 சதவீதமாக இருக்கும்.

2 முதல் 3 ஆண்டுகளுக்கான வைப்பு நிதிக்கு வட்டி விகிதம் 6.7 சதவீதத்தில் இருந்து 6.40 சதவீதமாகக் குறையும். 5 ஆண்டு வைப்பு நிதிக்கு 6.25 சதவீதமாக இருந்த வட்டி இனி 6 சதவீதமாக இருக்கும். ஐந்து ஆண்டுகளுக்கு மேற்பட்ட பருவ காலம் கொண்ட நிரந்தர வைப்பு நிதிக்கு 6.10 சதவீதமாக இருந்த வட்டி இனி 6 சதவீதமாக இருக்கும் என்று அந்த அறிக்கையில் குறிப்பிடப்பட்டுள்ளது.