பகுதி - 18

முருகா, எனக்கோ உன்னை தினந்தோறும் தொழும் பழக்கமே இல்லை.

Updated On : 29 செப்டம்பர், 2015 at 1:03 PM

Updated On : 9 ஜனவரி, 2024 at 12:22 PM

நேற்றைய பாடலின் பொருளை இப்போது பார்ப்போம்.

உனைத்தி னந்தொழு திலன் - முருகா, எனக்கோ உன்னை தினந்தோறும் தொழும் பழக்கமே இல்லை.உனதியல்பினை உரைத்திலன் - (செயலால் தொழுதும் இல்லை), உன்னுடைய இயல்பை (மனத்தால் எண்ணிப் பார்த்து, உணர்ந்து அதைப் பிறரும் உணருமாறு) எடுத்துச் சொல்லும் தன்மையும் இல்லை.பல மலர்கொடுன் அடியிணை - (இவைதான் இல்லையென்றாலும், மிக எளிமையாகச் செய்யக்கூடிய செயலாகிய) பல மலர்களைக் கொண்டு உன் இரண்டு பாதங்களிலும் (தூவி)உறப்ப ணிந்திலன் - (பூமியில் என் உடல் படியுமாறு) பொருந்த (உன் பாதத்தில் வீழ்ந்து) வணங்கவுமில்லை.ஒருதவ மிலன் - நான் எந்த வகையான தவமும் (முயற்சியும்) இல்லாதவன். (இவையெல்லாம் இருக்கட்டும்)உனதருள்மாறா உளத்து ளன்பினர் - (நான்தான் இவற்றையெல்லாம் செய்யவில்லை என்றாலும்) உன் அருளை எப்போதும் மறவாதவர்களும் உள்ளத்தினுள்ளே உன்பால் அன்பு நிறைந்தவர்களுமான (அடியவர்கள்)உறைவிடம் அறிகிலன் - எந்த இடத்தில் இருக்கிறார்கள் என்பதைக்கூட அறியாதவன் நான்.விருப்பொடுன் சிகரமும்வலம் வருகிலன் - (மனத்திலே பொங்கும்) ஆர்வத்தோடு உன் மலையை வலம்வருவதும் இல்லை. நான் கிரிவலம் செய்வதில்லை.உவப்பொடுன்புகழ் துதிசெய - உள்ளத்தில் மகிழ்ச்சி பொங்க, உன் புகழைப் பாடி உன்னைத் துதிக்கும்விழைகிலன் - விருப்பமும் என்னிடத்தில் இல்லை.இப்படியெல்லாம் இருக்கும்போது, முருகா,மலைபோலே கனைத்தெ ழும்பகடது - மலைபோன்ற பெரிய உருவத்துடன் கனைத்துக் கொண்டு வரும் எருமையின் (பகடு: எருமை)பிடர் மிசைவரு - கழுத்திலே அமர்ந்தபடி வருபவரான,கறுத்த வெஞ்சின மறலிதன் உழையினர் - கரிய நிறத்தையும் கடுங்கோபத்தையும் உடைய யமனுடைய அருகிலிருப்பவர்கள் (உழையினர் என்பது இந்த இடத்தில் [யமனுக்கு] அருகிருப்பவர்கள், யமதூதர்கள் என்று பொருள்படும்).கதித்து அடர்ந்து எறி கயிறு - (யமதூதர்கள் என்முன்னே) தோன்றி, கோபித்து வீசுகின்ற பாசக்கயிறு,அடுகதைகொடு பொருபோதே - துன்பத்தைத் தருவதான கதாயுதம் போன்றவற்றைக் கொண்டு (என் உயிரைப் பறிப்பதற்காக) என்னோடு போரிடும் சமயத்தில்,கலக்கு றுஞ்செயல் - என் மனமோ கலக்கம் எனும் செயலில் இறங்கும்;ஒழிவற அழிவுறு - அழியப்போகிறோம் என்ற எண்ணம் ஓயாமல் எழும் (நான் அவ்வாறு)நைந்து அலம் உறுபொழுது - நைந்து போய், துன்பப்படும் சமயத்தில் (அலம்: துன்பம்)அளவைகொள் கணத்தில் - ஒரு கணப்போதிலேஎன்பய மற - என் பயம் கெடும்படியாக (யாமிருக்க பயமேன் என்று சொன்ன வண்ணம்)மயில் முதுகினில் வருவாயே - நீ மயிலின் முதுகில் அமர்ந்த கோலமாய் என் முன்னே வர வேண்டும்.எப்போதும் போல இரண்டாம் அடியில் கோரிக்கை முடிந்தது. பின்னிரண்டு அடிகள், முருகனைத் துதிக்கின்றன. அவன் போர்செய்தவினைத்தலந்தனில் – போர்க்களத்தில்அலகைகள் குதிகொள - பேய்கள் குதித்துக் கூத்தாட (அலகை - பேய்) விழுக்கு உ டைந்துமெய் உகுதசை - (விழுக்கு - ஊன்) ஊன் கிழிபட்டு உடலிலிருந்து சிதறிவிழும் மாமிசத்தை,கழுகுண - கழுகுகள் உண்ணவும்விரித்த குஞ்சியர் எனும் - தலைவிரி கோலமாக, முடியவிழ்ந்து விழுந்து கிடப்பவர்களானஅவுணரை அமர்புரிவேலா - அசுரர்களோடு போர் புரிந்த வேலனே,மிகுத்த பண்பயில் குயில்மொழி - பலவிதமான பண்களில் (ராகங்களில்) பாடுபவளால குயிலை ஒத்த குரலை உடையவளும்,அழகிய கொடிச்சி - அழகானவள், கொடிபோன்றவளான (வள்ளியின்குங்கும முலைமுகடு உழு - குங்குமக் கலவையைப் பூசிய மார்பில் எழுதப்பட்ட, நறை விரைத்த சந்தன ம்ருகமத - நறைவிரைத்த - வாசனை கமழ்கின்ற; சந்தனம்; ம்ருகமதம்: கஸ்தூரி (ஆகிய வாசனைப் பொருட்களைப் பூசிய)புயவரை உடையோனே - மலை போன்ற தோள்களை உடையவனே,தினத்தினஞ் சதுர்மறைமுநி முறைகொடு - நான்கு வேதங்களிலும் (வல்லவனான) முனி—முனிவன், பிரமன், தினந்தோறும் முறைப்படி,புனற்சொரிந்து அலர் பொதிய - நீரைப் பொழிந்து அபிஷேகம் செய்தும் அலர்ப்பொதிய: ஏராளமான மலர்களால் அர்ச்சித்தும்,விணவரொடு - (விண்ணவரோடு என்பது விணவரோடு என்று விகாரமாயிற்று) தேவர்களும்சினத்தை நிந்தனை செயுமுநி வரர்தொழ - கோபத்தைக் கோபித்த (கோபத்தை ஒழித்த) முனிவரர்கள் தொழவும்மகிழ்வோனே - (அந்த வழிபாட்டில்) மனம் மகிழ்பவனேதெனத்தெனந்தன என - தெனத்தெனந்தன என்ற சப்தத்துடன் (சுழன்று பறக்கும்) வரி யளிநறை தெவிட்ட – வரிஅளி - வரிவண்டு; நறை - தேன். வரிவண்டுகள் திகட்டிப்போகும் அளவுக்குத் தேனை,அன்பொடு பருகு - ஆசையுடன் குடிப்பதாகியஉயர் பொழில்திகழ் - உயர்ந்த சோலைகள் விளங்கும்திருப் பரங்கிரி தனிலுறை - திருப்பரங்குன்றத்தில் வீற்றிருக்கும்சரவண பெருமாளே - சரவண மூர்த்தியே.முருகா, நான் செய்ய வேண்டிய எதையும் செய்யவில்லை. நான் எதைச் செய்ய மறந்தாலும், நீ என் இறுதி நேரத்தில் மயில்மேல் அமர்ந்த கோலத்தில் வந்து காட்சி தர வேண்டும். இதை நீ மறந்துவிடாதே!

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News

உடனுக்குடன் செய்திகளை அறிய தினமணி App பதிவிறக்கம் செய்யவும்.

பகுதி - 18

தொடர்புடைய செய்திகள்