பகுதி - 41

பதவுரை

வெங்காளர் கண்டர் கைச் சூலமும் ... கொடிய ஆலகால விஷத்தை அருந்திக் கருத்த நஞ்சுண்டகண்டனுடைய கையிலுள்ள திரிசூலமும்

திருமாயன் வெற்றிபெறு சுடராழியும் ... திருமாலுக்கு வெற்றிச் சின்னமாக விளங்கும் சுதர்சன சக்கரமும்

விபுதர்பதி குலிசமும் ... தேவர் தலைவனான இந்திரனுடைய வஜ்ராயுதமும்

சூரன் குலம் ... சூரபத்மனுடைய குலம் முழுவதையும்,

கல்லி ... வேரோடு பெயர்த்து, அழித்து

வெல்லா ... வெற்றியைத் தருவதற்குப் போதாதவை

எனக் கருதியே ... என்று நினைத்து,

சங்ராம நீ சயித்து அருள் என ... 'சிறந்த போர் வீரனே, நீயே (போரிட்டு) வென்று எங்களுக்கு அருள் செய்யவேண்டும் என, (சங்க்ராமன்: போர்வீரன்)

தேவரும் சதுர்முகனும் நின்று இரப்ப ... தேவர்களும் பிரம்மனும் வேண்டிக் கொள்ள,

சயிலமொடு சூரனுடல் ஒரு நொடியில் உருவியே ... கிரவுஞ்ச
மலையையும் சூரபத்மாவின் உடலையும் ஒரு நொடிப்பொழுதில் உருவி அழித்து வெளி வந்த

தனி ஆண்மை கொண்ட நெடு வேல் ... ஒப்பற்ற ஆண்மை கொண்ட
நெடிய வேலாயுதம்

(அது யாருடையது என கேட்டால்)

கங்காளி ... (பிரளய காலத்தில் தேவர்களுக்காக) எலும்பை மாலையாக அணிந்தவளும்

சாமுண்டி ... மஹிஷாசுரனை அழித்து, அவனுடைய எருமைத் தலைமேலே நிற்பவளும்

(மஹிஷன ஊரு என்பதே மைசூரு என்று திரிந்தது. மைசூரில் அமர்ச்திருப்பவள் சாமுண்டேஸ்வரி)

வராகி ... வராக மூர்த்தியின் சக்தயசப்த மாதர்களில் ஒருவளான வராக மூர்த்தியின் சக்தியாக இருப்பவளும்,

இந்திராணி ... இந்திரனின் சக்தியானவளும்,

கெளமாரி ... குமார மூர்த்தியின் சக்தியானவளும்,

கமலாசனக் கன்னி ... தாமரையைப் பீடமாகக் கொண்டுள்ள இளமை மாறாத கன்னியும்,

நாரணி ... காத்தல் தொழிலைச் செய்யும் வைஷ்ணவி, நாராயணி என்றெல்லாம் நிற்பவளும்,

குமரி ... எப்போதும் இளமையாக விளங்குபவளும்,

திரிபுரை ... மூன்று உலகங்களுக்கும் தலைவியும்,

பைரவி ... பைரவரின் சக்தியும்,

அமலை ... மலம் அற்றவளும்,

கெளரி ... பொன்னிறமானவளும்,

காமாக்ஷி, காமாட்சி ... அடியாருடைய விருப்பங்களை நிறைவேற்றும் கண்களைக் கொண்டவளும்,

சைவ சிங்காரி ... சிவனுடைய துணைவியும் பேரழகு கொண்டவளும்,

யாமளை ... பச்சை நிறத்தவளும் (சியாமளா = யாமளா)

பவானி ... பவக்கடலான பிறவியை நீக்குபவளும்,

கார்த்திகை ... கார்த்திகை மாதர்களாக வருபவளும்,

கொற்றி ... (யுத்தகளத்தின் நாயகியாய் நின்று) வெற்றியளிப்பவளும்,

திரியம்பகி ... முக்கண்ணுடையவளுமான

உமை,
அளித்த ... பெற்றருளிய

செல்வச் சிறுவன் ... ஞானச் செல்வமாகிய பாலன்,

அறுமுகன் ... ஷண்முகன்,

முருகன் ... ஞானமே வடிவானவன்,

நிருதர்கள் குல அந்தகன் ... அரக்கர் குலத்துக்கு யமனாக விளங்கி அவர்களை அழித்தவன்

செம் பொன் திருக்கை வேலே ... திருக்கையிலே விளங்கும்
பொன்னொளி வீசும் அழகிய வேலாயுதமே அதுவாகும்.

பொருள் சுருக்கம்

ஒன்றன்மேலொன்றுக்குப் பகையில்லை என்றால், ஒன்றின் அழிவுக்கு இன்னொன்று காரணமாயிருக்கப் போவதில்லை. சூரபன்மன் என்ற அஞ்ஞான சக்தியை அழிக்க ஞான சொரூபமான வேலே வல்லது என்பதால் திரிசூலம், சக்ராயுதம், வஜ்ராயுதம் போன்ற இதர ஆயுதங்களால் அவ்வாறு அழிக்க முடியாது என்று தேவர் முதலானவர்கள் நினைத்தார்கள்.

வேல், முருகனுடைய தங்கையாகிய ‘ஜோதி’ என்ற ஒரு கருத்தும் உண்டு. இங்கே காண்க: http://murugan.org/jyoti.htm

இப்படிப்பட்ட இந்த வேல், சக்தியின் புதல்வனான முருகனுடைய கையிலுள்ள ஞானத் திருவேலாகும்.

அருணகிரியார் ‘பருவம் பணைத்திரண்டு’ என்ற சிதம்பரத் திருப்புகழில்

செருவெங் களத்தில் வந்த அவுணன் தெறித்து மங்க

சிவமஞ் செழுத்தை முந்த விடுவோனே

என்று அஞ்செழுத்தாகிய பஞ்சாக்கரமே வேல் என்ற குறிப்பையும் சொல்கிறார்.

</p><p align="JUSTIFY"><iframe height="250" src="https://w.soundcloud.com/player/?url=https%3A//api.soundcloud.com/tracks/229852434&auto_play=false&hide_related=false&show_comments=true&show_user=true&show_reposts=false&visual=true" width="75%" /></p><p align="JUSTIFY"><strong> </strong></p>