பட்டாசு சத்தம்: வேலூர். மூ.மோகன்

மனிதனின் ஜனனம் தொடங்கி
மரணம்வரை தொடர்ந்தே வந்து
பின்னிப் பிணைந்தே பயணம் -
பட்டாசின் பொருமல் சத்தம்!

இருமனம் இணையும் திருமண
வரவேற்பில் வண்ணப் பூச்சொரியும்;
புது வாரிசு வரும் தருணத்திலும்
விதவிதமாய் மத்தாப்பு பூக்கும்!

கோவில் திருவிழா உற்சவர் உலாவில்
'அதிர்வேட்டாய்' காதைப் பிளக்கும்;
தேர்தல் திருவிழா வேட்பாளர் வருகையில்
 'தௌஸன்வாலா'வாய் வெடிக்கும்..

மன்மத அம்புகள் தைத்த மனங்கள்
பட்டாம்பூச்சியாய் பறக்கும் நேரம்..
இனம்புரியா காதல் மயக்கத்தில்
எவரெஸ்ட்டுக்கே 'ராக்கெட்' பயணம்!

எல்லாம் முடிந்து ஆடியடங்கி
எமனின் அழைப்பை ஏற்கும் வேளை..
பல்லக்கின் 'சொகுசுப் பயண'த்திலும்
பட்டாசு சத்தம் பெரிசாய் கேட்கும்!