இலைகள் சருகானதால்
சூரிய தாகம் இங்கு 
சுருதி ஏறி அலைகிறது!

சூரியக் கதிர்களால்
துளிர் விட்ட இலைகள்
கருகுங் காலம் இது!

அற்ப ஆசைகளால்தான் 
இந்த மனிதர்கள்
ஆபத்தைச் சந்திக்கிறார்கள்!

கோடை மழை ஏமாற்றினாலும்
பணமழைக்கு  நாட்டில்
பஞ்சமிருப்பதாகத் தெரியவில்லை!

பணவெள்ளம் ஆர்.கே நகரைப் 
புரட்டியே போட்டதால்
போயிற்று தேர்தலும்!

முன்னவர் கோடு போட...
பின்னவர் ரோடே போட...
தடுமாறிக் கிடக்கிறது தமிழகம்!

எல்லா சானல்களிலும்
இவர்களைப் பற்றிய பேச்சுதான்
இருபத்து நாலு மணி நேரமும்!

உழுதே இளைத்தவன்...
இடுப்புத் துணியுமின்றி...
இருக்கிறான் தலைநகரில்!

கூவத்தூர் கூட்டம் இங்கு
கும்மாளம் போட்டுக் கொண்டே
கூட்டைத் தேடுகிறது!

தாகங் காரணமாகவே தமிழகம்...
இந்திய வரை படத்திலிருந்து...
உதிர்ந்திடுமோ என்றே பயம்!