வானத்தை விற்பனைக்கு      விலைபேசி விற்கின்றார்; கானலையும் தண்ணீராய்      காசுக்கு விற்கின்றார்; ஆனவரை பணத்திற்காய்       அடிமையாகி போகின்றார்; ஈனரிவர் செயல்யாவும்       என்றும்என் இதயத்தில்! அழுக்கெல்லாம் மேகமாக        அழுதிடவே  துடிக்கிறது; வழுக்குகிற பாசிகளோ         வழுக்கிவிழ  செய்கிறது;அழுதிடவே பிறந்தவர்போல்          உழவரவர்  அழுகின்றார்; எழுச்சியின்றி துயரெல்லாம்          என்றும்என் இதயத்தில்! கல்விக்கோர் விலையென்று     கலவிக்கோர் விலையென்றுபுல்லர்க்கோர் விலையென்று     நல்லோர்க்கோர் விலையென்றுஎல்லோர்க்கும் விலைவைத்து      எளியோரை வதைக்கின்றார்; எல்லாமே ஈரமாக      என்றும்என் இதயத்தில்! மாறாத வடுவாகி      மனிதமற்ற செயல்களாலே தீராத கொடுமையாகி      தினந்தோறும் துடிப்பதாலே ஆராத புண்ணாகி       அன்றாடம் ஏக்கமுண்டு;ஏறாத வாழ்வெண்ணி       என்றும்என் இதயத்தில்!