ஸ்ரீவில்லிபுத்தூா் ஆண்டாள் கோயிலில் ஆடிப்பூரத் தேரோட்டத் திருவிழா புஷ்ப யாகத்துடன் வியாழக்கிழமை இரவு நிறைவடைந்தது.

108 திவ்ய தேசங்களில் சிறப்புமிக்க ஸ்ரீவில்லிபுத்தூா் ஆண்டாள் கோயிலில் ஆடிப்பூர தேரோட்டத் திருவிழா கடந்த 20-ஆம் தேதி கொடியேற்றத்துடன் தொடங்கியது. இந்த விழாவில் பெரியாழ்வாா் மங்களா சாசனம், 5 கருட சேவை, சயன சேவை, பூப்பல்லக்கு உள்ளிட்ட உத்ஸவங்கள் நடைபெற்றன. முக்கிய நிகழ்வான ஆடிப்பூரத் தேரோட்டம் கடந்த 28-ஆம் தேதி நடைபெற்றது. 12-ஆம் நாள் விழாவான வியாழக்கிழமை இரவு ஆண்டாள், ரங்கமன்னாா் சிறப்பு அலங்காரத்தில் வெள்ளிக் குறடு மண்டபத்தில் எழுந்தருளினா். அங்கு யாகம் வளா்த்து சிறப்பு பூஜை செய்யப்பட்டு, புஷ்ப யாகத்துடன் ஆடி பூரத் தேரோட்ட திருவிழா நிறைவடைந்தது.