பட்டாம் பூச்சி பறக்கிறது -உயிர்ப்

பூவின் இதழைத் திறக்கிறது!

பட்டுப் போன்ற சிறகாலே -தினம்

பறந்து துயரம் மறக்கிறது!

மொட்டின் மேலே அமர்கிறது -அதில்

மூழ்கி வாசம் நுகர்கிறது!

வட்டம் போட்டுப் பறந்தபடி -தேன்

வாரிக் குடித்து நகர்கிறது!

சிறகால் உலகை அளக்கிறது -தன்

ஜீவனை மகிழ்வாய் வளர்க்கிறது!

சுறுசுறுப்பாகத் தினம் பறந்து -நறுஞ்

சோலையில் பூப்போல் கலக்கிறது!

வண்ணம் சுமந்து வாழ்கிறது -தன்

வனப்பால் உலகை ஆள்கிறது!

மண்ணில் சொர்க்கம் கண்டதுபோல் -அது

மலரின் மடியில் வீழ்கிறது!

பட்டாம் பூச்சி போலிருப்போம் -தினம்

பகலும் இரவும் மகிழ்ந்திருப்போம்!

கிட்டா இன்பம் கிட்டுமென -நாம்

காலையில் சுகமாய்க் கண்விழிப்போம்!