கோடை விடுமுறை...

கோடை விடுமுறை விட்டாச்சு

குளுகுளு கிராமம் சென்றிடலாம்!

ஓடைக் கரையில் நடந்திடலாம்

உள்ளான் கொக்கு பார்த்திடலாம்!

ஏற்றப் பாட்டைக் கேட்டிடலாம்

இனிக்கும் பதநீர் குடித்திடலாம்!

காற்றில் ஒலிக்கும் குயில்பாட்டு

காதில் கேட்டு மகிழ்ந்திடலாம்!

ஆற்றங் கரையில் ஓடிடலாம்

ஆலம் விழுதில் ஆடிடலாம்!

கூட்டாஞ் சோறு ஆக்கிடலாம்

கொம்புத் தேனைச் சுவைத்திடலாம்!

குட்டிக் கிராம ஆற்றினிலே

குவிந்து கிடக்கும் மணலினிலே

கிச்சுக் கிச்சுத் தாமரை யாம்

குச்சி வைத்தே விளையாடிடலாம்!

பாட்டி சொல்லும் பழங்கதைகள்

படுத்துக் கொண்டே ஊம் போட்டுக்

கேட்டுக் கொண்டே தூங்கிடலாம்

கொள்ளை மகிழ்ச்சி நாளெல்லாம்!