குரங்கு

 வண்ணச் சட்டை போட்டிருக்குது
 வித்தைக்காரக் குரங்கு
 வாலை அசைத்து நடக்கிறது
 வித்தைக்காரக் குரங்கு
 
 குட்டிக்கரணம் போட்டுவிட்டு
 கண்ணை உருட்டிப் பார்க்கிறது
 ஒட்டிப்போன வயிற்றுப் பக்கம்
 விரல்நகத்தால் சொறிகிறது
 
 உயர்ந்து நிற்கும் கம்பத்திலே
 ஒட்டிக்கொண்டு ஏறுகிறது
 உச்சிமீது அமர்ந்துகொண்டு
 உற்று உற்றுப் பார்க்கிறது
 
 உரித்துக் கொடுத்த வாழைப்பழத்தை
 ஒய்யாரமாய்த் தின்கிறது
 சப்பை மூக்கை உறிஞ்சிக்கொண்டு
 கையை உயர்த்தி அசைக்கிறது
 
 கூடி நின்ற கூட்டமெல்லாம்
 கைதட்டி சிரிக்கிறது
 கம்பத்திலிருந்த வித்தைக்குரங்கு
 தரையை நோக்கிக் குதிக்கிறது
 
 தட்டு சுமந்து நடக்கிறது
 வித்தைக்காரக் குரங்கு
 சில்லறை கேட்டு நிற்கிறது
 வித்தைக்காரக் குரங்கு.