லோகேஷ் கனகராஜ் இயக்கத்தில் விஜய் நடித்துள்ள "மாஸ்டர்' படத்திற்கு அனிருத் இசை அமைத்துள்ளார். இப் படத்திலிருந்து முதல் பாடலான "குட்டி ஸ்டோரி' பாடல் பிப்ரவரி மாதம் 14- ஆம் தேதி வெளியானது. இரண்டாவது பாடலாக, "வாத்தி கம்மிங்' பாடல் மார்ச் தொடக்கத்தில் வெளியானது. சென்னை வட்டார வழக்கில் அமைந்துள்ள வரிகளுடன் இந்தப் பாடல் நல்ல வரவேற்பைப் பெற்றது.

"மாஸ்டர்' திரைப்படத்தின் மூன்றாவது பாடல் "வாத்தி ரெய்டு' மார்ச் 14 - ஆம் தேதி வெளியானது. விஜய் ரசிகர்களும் இசை ரசிகர்களும் இப்பாடலை மகிழ்ச்சியுடன் கொண்டாடி வருகிறார்கள். இதுவரை ஒன்றரை கோடிக்கும் அதிகமான பார்வையாளர்களைக் கடந்திருக்கும் அப்பாடல் குறித்து,தெலுங்கின் முன்னணி நடிகர்களில் ஒருவரான அல்லு சிரிஷ், "வாத்தி ரெய்டு.. வாத்தி ரெய்டு.. ஆன் ரிப்பீட்' என்று சுட்டுரையில் பதிவிட்டிருந்தார். இது விஜய் ரசிகர்களிடையே வைரலாகி வருகிறது. "மாஸ்டர்' படத்தை செவன் ஸ்கிரீன் சார்பில் லலித் வெளியிடுகிறார்.