ஒரு பக்கம் டீ - மறுபக்கம் பதக்கம்

ஒரு பக்கம் டீ போடுகிறார்... மறுபக்கம் பதக்கங்களைக் குவிக்கிறார் 45 வயது ஆர்.மஞ்சுநாத்.

மைசூரைச் சேர்ந்த இவர் தினமும் அதிகாலையில் தன் கடைக்கு வந்து டீ போட்டு, வாடிக்கையாளர்களுக்கு தருகிறார். மறுபுறம்... பாரா - அதலெட்டிக் விளையாட்டுகளில் பதக்கங்களை குவிக்கிறார். 5 வயதிலேயே போலியோவால் இடது கால் பாதிக்கப்பட்டவர். 

பின்னால் வாகன டிரைவர், சமையல் கேஸ் டெலிவரி எனப் பல வேலைகளைப் பார்த்தாலும், இவருக்கு விளையாட்டில்தான் மிகுந்த ஈடுபாடு. பேட்மின்டன் விளையாடிய போது, இவருடைய கோச் ராமசந்திரா, ""ஜாவலின் த்ரோ, டிஸ்கஸ் மற்றும் ஷாட் புட் போன்றவற்றில் பயிற்சி பெற்று சாதிக்கலாமே!'' எனக் கூற, அதனை ஏற்று அவற்றைப் பயிற்சி செய்ய ஆரம்பித்தார். முதலில் ஜாவலின் த்ரோ எறிந்த போது 6 மீட்டர்தான் சென்றது. இன்று 16 மீட்டர் செல்கிறது என பெருமையாகக் கூறும் மஞ்சுநாத் இதுவரை கர்நாடக மாநில அளவில் 16 பதக்கங்களும், இந்திய அளவில் 12 பதக்கங்களும், அகில உலக அளவில் 5 பதக்கங்களும் பெற்றுள்ளார்.