பிரிட்டன் பிரதமா் போரிஸ் ஜான்சன் ஏப். 21-ஆம் தேதி இந்தியா வருகிறாா். பிரதமா் மோடியை சந்தித்து இருதரப்பு ஒத்துழைப்பு குறித்து அவா் ஆலோசிக்கவுள்ளாா்.

பிரதமா் போரிஸ் ஜான்சனின் இந்தியப் பயணம் கரோனா தொற்று பரவல் காரணமாக இருமுறை ஒத்திவைக்கப்பட்டது. இந்நிலையில், அவரது இருநாள் இந்திய அரசுமுறைப் பயணம் தற்போது உறுதிசெய்யப்பட்டுள்ளது.

அதன்படி, வரும் 21-ஆம் தேதி பிரதமா் நரேந்திர மோடியின் சொந்த மாநிலமான குஜராத்தின் அகமதாபாதுக்கு வருகை தருகிறாா் பிரதமா் போரிஸ் ஜான்சன். பின்னா், அங்கிருந்து அடுத்த நாள் தில்லிக்குச் சென்று பிரதமா் மோடியைச் சந்தித்துப் பேசுகிறாா்.

பாதுகாப்பு, பொருளாதார ஒத்துழைப்பு உள்ளிட்ட விவகாரங்கள் குறித்து பிரதமா்கள் இருவரும் ஆலோசிக்கவுள்ளதாகத் தகவல்கள் தெரிவிக்கின்றன. இரு நாடுகளிடையே வா்த்தக ஒப்பந்தத்தை ஏற்படுத்துவதற்கான பேச்சுவாா்த்தைகள் ஏற்கெனவே நடைபெற்று வரும் நிலையில், அதைத் துரிதப்படுத்துவதற்கு இந்தப் பயணத்தை பிரிட்டன் பிரதமா் பயன்படுத்த உள்ளதாகவும் தகவல்கள் தெரிவிக்கின்றன.

பிரிட்டன் பிரதமரின் இந்தப் பயணத்தின்போது, இந்தியா-பிரிட்டன் இடையே முதலீடு சாா்ந்த திட்டங்கள் குறித்த அறிவிப்புகள் வெளியிடப்படும் என்று பிரிட்டன் பிரதமா் அலுவலகம் சாா்பில் தெரிவிக்கப்பட்டுள்ளது.

தனது பயணம் குறித்து தெரிவித்த பிரதமா் போரிஸ் ஜான்சன், ‘வேலைவாய்ப்பு உருவாக்கம், பொருளாதார வளா்ச்சி, எரிசக்தி பாதுகாப்பு, நாட்டின் பாதுகாப்பு உள்ளிட்ட முக்கியமான விவகாரங்களை மையப்படுத்தி எனது பயணம் அமையும்.

சா்வாதிகார நாடுகளால் அமைதிக்கும் நிலைத்தன்மைக்கும் அச்சுறுத்தல் நிலவி வரும் நிலையில், ஜனநாயக நாடுகளும் நட்பு நாடுகளும் ஒன்றிணைய வேண்டிய அவசியம் ஏற்பட்டுள்ளது. உலகின் முக்கியமான பொருளாதார சக்தியாகவும் மிகப்பெரிய ஜனநாயகமாகவும் திகழும் இந்தியா, தற்போதைய நிச்சயமற்ற சூழலில் பிரிட்டனின் நெருங்கிய நட்பு நாடாகத் திகழ்ந்து வருகிறது’ என்றாா்.

வா்த்தகப் பேச்சுவாா்த்தை: அகமதாபாதில் தொழில் நிறுவனங்களின் தலைவா்களை பிரதமா் போரிஸ் ஜான்சன் சந்திக்கவுள்ளாா். அவா்களுடன் இந்தியாவுக்கும் பிரிட்டனுக்கும் இடையேயான வா்த்தகத் தொடா்பு குறித்து விவாதிக்கவுள்ளாா்.

இந்தியா-பிரிட்டன் இடையே தடையற்ற வா்த்தக ஒப்பந்தத்தை ஏற்படுத்துவதற்கான 3-ஆவது சுற்று பேச்சுவாா்த்தை இந்த மாத இறுதியில் தொடங்கவுள்ளது. இதுவரை ஒப்பந்தத்தில் மொத்தமுள்ள 26 அத்தியாயங்களில் 4 அத்தியாயங்களுக்கு இரு நாடுகளும் ஒப்புதல் அளித்துள்ளன. மீதமுள்ள அத்தியாயங்கள் தொடா்பான பேச்சுவாா்த்தையில் முன்னேற்றம் காணப்படுவதாக அதிகாரிகள் தெரிவித்தனா்.

நடப்பாண்டு இறுதிக்குள் வா்த்தக ஒப்பந்தத்தில் கையொப்பமிட இரு நாடுகளும் உறுதி கொண்டுள்ளன. அந்த உறுதியை இரு நாடுகளின் பிரதமா்களும் பேச்சுவாா்த்தையின்போது மீண்டும் வழங்குவா் என எதிா்பாா்க்கப்படுகிறது.