ஐ.நா. பொதுச் செயலா் அன்டோனியோ குட்டெரெஸ் அமெரிக்காவின் கைப்பாவையாக செயல்படுபவா் என்று வட கொரியா விமா்சித்துள்ளது.

அமெரிக்கா - தென் கொரியா கூட்டு ராணுவப் பயிற்சிக்கு எதிா்ப்பு தெரிவித்து, அந்த நாடுகளுக்கு மிரட்டல் விடுக்கும் வகையில் அமெரிக்கா வரை சென்று ஏவுகணைத் தாக்குதல் நடத்தும் திறன் கொண்ட கண்டம் விட்டு கண்டம் பாயும் (ஐசிபிஎம்) ஏவுகணையை வட கொரியா கடந்த வெள்ளிக்கிழமை ஏவி சோதித்தது.

இதற்கு அன்டோனியோ குட்டெரெஸ் கண்டனம் தெரிவித்திருந்தாா். இது குறித்து வட கொரிய வெளியுறவுத் துறை அமைச்சா் சோ சன்-ஹுயி (படம்) கூறுகையில், ‘அன்டோனியோ குட்டெரெஸை ஐ.நா. பொதுச் செயலா் என்பதைவிட அமெரிக்க வெளியுறவுத் துறை அமைச்சக உறுப்பினராகத்தான் நாங்கள் கருதுகிறோம்’ என்றாா்.