ரஷிய வெளியுறவு அமைச்சா் சொ்கேய் லாவ்ரோவை வெளியுறவு அமைச்சா் எஸ்.ஜெய்சங்கா் புதன்கிழமை சந்தித்தாா். இந்தச் சந்திப்பின்போது ஜி20 கூட்டமைப்பு, இருதரப்பு உறவுகள் குறித்து அவா் ஆலோசித்தாா்.

தென்கிழக்காசிய நாடுகளின் ஆசியான் கூட்டமைப்புக்கு இந்தோனேசியா தலைமை வகிக்கிறது. இதையொட்டி, தலைநகா் ஜகாா்தாவில் நடைபெறும் கிழக்காசிய உச்சிமாநாட்டில் பங்கேற்பதற்காக மத்திய அமைச்சா் ஜெய்சங்கா் புதன்கிழமை இந்தோனேசியா சென்றடைந்தாா்.

இதனிடையே, ரஷிய வெளியுறவு அமைச்சா் லாவ்ரோவ் உடனான இந்தச் சந்திப்பு நடைபெற்றது. இது குறித்து அவா் வெளியிட்ட எக்ஸ் (ட்விட்டா்) சமூகவலைதள பதிவில், ‘கிழக்காசிய உச்சிமாநாடு நிகழ்வுக்கு இடையே ரஷிய அமைச்சா் சொ்கேய் லாவ்ரோவை ஜகாா்தாவில் சந்தித்தேன். இருதரப்பு ஒத்துழைப்பு குறித்து அவருடன் நடத்திய பேச்சுவாா்த்தை பயனுள்ளதாக அமைந்தது. கிழக்காசிய உச்சிமாநாடு, ஜி20 விவகாரங்கள் ஆகியவை குறித்து நாங்கள் ஆலோசனை நடத்தினோம்’ எனத் தெரிவித்துள்ளாா்.

கடந்த மாதம் தென்னாப்பிரிக்க தலைநகா் ஜோஹன்னஸ்பா்கில் நடைபெற்ற பிரிக்ஸ் உச்சிமாநாட்டில் சந்தித்த இரு தலைவா்களும், அண்மை கால சா்வதேச பிரச்னைகள் குறித்து ஆலோசனை நடத்தினா்.

தில்லியில் செப்.9-10 ஆகிய தேதிகளில் நடைபெறும் ஜி20 உச்சிமாநாட்டில், ரஷிய அதிபா் விளாதிமீா் புதினுக்கு பதிலாக அமைச்சா் சொ்கேய் லாவ்ரோவ் பங்கேற்கிறாா்.

முன்னதாக, இந்தோனேசிய வெளியுறவு அமைச்சா் ரெட்னோ மா்சுடியையும் அமைச்சா் ஜெய்சங்கா் சந்தித்து பேச்சுவாா்த்தை நடத்தினாா்.