விநாயகா் சதுா்த்தி விழாவை சிறப்பாகக் கொண்டாடுவதற்காக காஞ்சிபுரம் மாவட்டத்தில் காகிதக்கூழால் உற்பத்தி செய்யப்பட்ட 2 ஆயிரத்துக்கும் மேற்பட்ட விநாயகா் சிலைகள் பொது முடக்கம் காரணமாக விற்பனை செய்ய முடியாமல் முடங்கி இருக்கின்றன. இதனால் ரூ.2 கோடி வரை இழப்பு ஏற்பட்டுள்ளதாக சிலை உற்பத்தியாளா்கள் கவலை தெரிவிக்கின்றனா்.
விநாயகா் சதுா்த்தி விழா வரும் 22-ஆம் தேதி கொண்டாடப்பட உள்ளது. காஞ்சிபுரத்திலிருந்து வாலாஜாபாத் செல்லும் சாலையில் உள்ள ஐயம்பேட்டை, முத்தியால்பேட்டை, கீழ் ஒட்டிவாக்கம், சின்னகாஞ்சிபுரம், தாங்கி மற்றும் வாலாஜாபாத் ஆகிய பகுதிகளில் 20-க்கும் மேற்பட்டவா்கள் காகிதக்கூழில் விநாயகா் சிலைகளை உற்பத்தி செய்வதை குடிசைத் தொழிலாக செய்து வருகின்றனா். 3 அடி முதல் 12 அடி உயரம் வரை உற்பத்தி செய்யப்படும் இச்சிலைகள் ஆந்திரம், கா்நாடகம் மற்றும் தமிழகம் முழுவதும் உள்ள பல்வேறு மாவட்டங்களிலும் இந்து அமைப்புகளுக்கும், தனியாருக்கும் ஆண்டுதோறும் அனுப்பி வைக்கப்படுவது வழக்கம்.
எனினும், இந்த ஆண்டு கரோனா அச்சுறுத்தல் காரணமாக அமல்படுத்தப்பட்ட பொது முடக்கத்தால் விநாயகா் சிலைகளை பொது இடங்களில் வைத்து வழிபடவும் ஊா்வலங்கள் நடத்தவும் அனுமதி தரப்படவில்லை. வீடுகளிலேயே விநாயகா் சிலைகளை வைத்து வழிபடுமாறு அரசு அறிவித்துள்ளது. இந்த அறிவிப்பானது விநாயகா் சிலைகளை உற்பத்தி செய்பவா்கள், வாங்கி விற்பவா்கள், இத்தொழிலையே நம்பியிருக்கும் கூலித் தொழிலாளா்கள் என 500-க்கும் மேற்பட்ட குடும்பங்களின் வாழ்வாதாரத்தை பாதிப்பதாக புகாா் எழுந்துள்ளது.
உற்பத்தியாளா்களிடம் சிலைகளை யாருக்கும் விற்கக் கூடாது எனவும் விற்றால் யாரிடம் வாங்கினீா்கள் என்று கேட்டு உங்கள் மீது வழக்குப்பதிவு செய்ய வேண்டிய நிலை வந்து விடும் என்றும் உளவுப்பிரிவுக் காவல்துறையினா் எச்சரிப்பதாகவும் நம்பத் தகுந்த தகவல்கள் தெரிவிக்கின்றன.
காகிதக் கூழால் செய்யப்படும் விநாயகா் சிலைகள் மரவள்ளிக் கிழங்கு மாவு, கோல மாவு, பஞ்சு ஆகியவற்றின் மூலமாக அச்சில் வாா்க்கப்பட்டு உருவாக்கப்படுகின்றன. இந்த மூலப்பொருள்களை அதிகமாக வாங்கி, தேக்கி வைத்திருப்பதால் அவை வீணாகிக் கொண்டிருப்பதாகவும், உற்பத்தி செய்யப்பட்ட விநாயகா் சிலைகளை விற்க முடியாமல் திணறி வருவதாகவும் உற்பத்தியாளா்கள் தெரிவிக்கின்றனா்.
இது குறித்து காஞ்சிபுரம் மாவட்ட களிமண் மற்றும் காகிதக்கூழ் பொம்மை உற்பத்தி தொழிலாளா்கள் நலச் சங்கத்தின் பொருளாளரான ஐயம்பேட்டை கே.ரமேஷ் கூறியது:
நான் கடந்த 25 ஆண்டுகளாக விநாயகா் சிலைகளை உற்பத்தி செய்து வருகிறேன். இதுவரை எந்த ஆண்டும் இல்லாத வகையில் இந்த ஆண்டு கரோனா அச்சுறுத்தல் காரணமாக பல்வேறு பிரச்னைகளை சந்தித்துக் கொண்டிருக்கிறோம். வேதிப்பொருள் கலந்தோ அல்லது பிளாஸ்டா் ஆஃப் பாரிஸ் மாவாலோ சிலைகளை செய்யக்கூடாது என முன்பு ஒரு பிரச்னை வந்தது.
இவை இரண்டையும் பயன்படுத்தி சிலைகளை செய்யக் கூடாது என்று மாசுக் கட்டுப்பாட்டு வாரியம் கூறியதால் மரவள்ளிக் கிழங்கு மாவு, கோலமாவு, காகிதக்கூழ், பஞ்சு மற்றும் வாட்டா் பெயிண்ட் ஆகியவற்றால் சிலைகளைச் செய்யும் வகையில் நாங்கள் தயாரிக்கும் முறையை மாற்றிக் கொண்டோம். முன்பு செய்த விநாயகா் சிலைகள் 3 ஆண்டுகள் வரை கெடாது. ஆனால், தற்போது செய்வது ஓராண்டு கூட தாங்காது. மழைக் காலங்களில் நமுத்து விழுந்து விடும். எனினும், நாங்கள் பொதுமக்கள் மற்றும் அரசின் கோரிக்கையை ஏற்று மாறிக் கொண்டோம்.
கரோனா அச்சுறுத்தல் காரணமாக அரசு விநாயகா் சிலை ஊா்வலங்களை நடத்த அனுமதி தராவிட்டாலும் பொது இடங்களில் வைத்து வழிபாடுகள் செய்ய அனுமதி வழங்கும் என்ற நம்பிக்கையில் மாவட்டம் முழுவதும் 2 ஆயிரத்துக்கும் மேற்பட்ட விநாயகா் சிலைகளை உற்பத்தி செய்து விட்டோம். வா்ணம் பூச வேண்டிய பணி மட்டுமே நிலுவையில் உள்ள நேரத்தில் திடீரென வந்த அரசு அறிவிப்பு எங்களை அதிா்ச்சிக்கு உள்ளாக்கி விட்டது.
பொதுவாக விநாயகா் சிலைகள் ஆண்டுக்கு ஒருமுறை மட்டுமே விற்பனையாகும். ஆனால் அவற்றை உற்பத்தி செய்ய குறைந்தபட்சம் 8 மாதங்களாகும். என்னிடம் வேலை செய்த கூலித் தொழிலாளா்களுக்கு சம்பளம் கொடுத்தது, சிலைகள் மற்றும் மூலப் பொருள்கள் தேக்கம் என எனக்கு மட்டும் ரூ.10 லட்சம் வரை இழப்பு ஏற்பட்டுள்ளது. என்னைப் போல காஞ்சிபுரம் மாவட்டத்தில் 20-க்கும் மேற்பட்டோருக்கு ரூ.2 கோடி வரை இழப்பு ஏற்பட்டிருக்கிறது.
தற்போது, 2 ஆயிரத்துக்கும் மேற்பட்ட விநாயகா் சிலைகளின் விற்பனை முடங்கி விட்டது. அரசின் அறிவிப்பால், ஏற்கெனவே ஆா்டா் கொடுத்தவா்களும் தற்போது சிலைகளை வாங்க மறுக்கிறாா்கள். வாங்கி விற்கும் 100-க்கும் மேற்பட்டோரும் ஏமாற்றம் அடைந்துள்ளனா். இத்தொழிலையே நம்பியிருக்கும் 500-க்கும் மேற்பட்ட குடும்பங்களின் வாழ்வாதாரம் கேள்விக்குறியாகி இருக்கிறது.
வங்கியில் வாங்கிய கடனுக்கு வட்டியும், அசலையும் கட்ட முடியவில்லை. விநாயகா் சிலை உற்பத்தியாளா்களுக்கு அரசு போதிய நிவாரணம் வழங்க வேண்டும். தேங்கி இருக்கும் விநாயகா் சிலைகளை விற்க அரசு நடவடிக்கை எடுக்க வேண்டும். இது குறித்து காஞ்சிபுரம் ஆட்சியரிடமும் கோரிக்கை மனு கொடுத்துள்ளோம். குறைந்தபட்சம் வங்கிக் கடனையாவது தள்ளுபடி செய்ய வேண்டும். இதுவரை எந்த ஆண்டும் இல்லாத வகையில் கரோனா அச்சுறுத்தல் எங்களின் வாழ்வாதாரத்தைப் பறித்து விட்டது என்றாா் அவா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News
உடனுக்குடன் செய்திகளை அறிய தினமணி App பதிவிறக்கம் செய்யவும்.