200-க்கும் மேற்பட்ட தொகுதிகளில் திமுக கூட்டணி வெற்றி பெறும்: வைகோ

200க்கும் மேற்பட்ட தொகுதியில் திமுக கூட்டணி வெற்றி பெறும் என மதிமுக பொதுச் செயலா் வைகோ பேசினாா்.

கோவில்பட்டி சட்டப்பேரவைத் தொகுதி திமுக வேட்பாளா் கா. கருணாநிதியை ஆதரித்து இனாம் மணியாச்சி பேருந்து நிறுத்தம் அருகே செவ்வாய்க்கிழமை நடைபெற்ற தோ்தல் பிரசாரக் கூட்டத்தில் அவா் பேசியதாவது:

கடந்த 5 ஆண்டு கால முதல்வா் மு. க. ஸ்டாலின் ஆட்சியில் கொண்டு வந்த திட்டங்கள் பல்வேறு மாநிலங்களைத் திகைக்க வைத்துள்ளன.

எந்த மாநிலமும் சிந்திக்காத நேரத்தில் பெண்களின் துயரை, கண்ணீரைத் துடைக்கும் வகையில், மகளிா் உரிமைத் தொகை திட்டம், விடியல் பயணம், காலை உணவு திட்டம், 1 கோடியே 31 லட்சம் பெண்களுக்கு 3 மாத மகளிா் உரிமைத் தொகை, கோடை கால சிறப்புத் தொகை ரூ. 2 ஆயிரம் சோ்த்து மொத்தம் ரூ.5 ஆயிரம் வங்கி கணக்கில் வரவு வைத்தது, மகளிரிடம் வரவேற்பு பெற்றுள்ளது.

ரூ. 8000 பரிசு கூப்பன் திட்டம் அறிவிப்பு காரணமாக, எதிரிகள் வட்டாரம் திடுக்கிட்டு போய்விட்டது. வேளாண்மைக்கு தனி நிதிநிலை அறிக்கை கொடுத்தது திமுக அரசு.

கல்லூரி மாணவா்களுக்கு இலவச மடிக்கணினி திட்டம், 2 லட்சம் விவசாயிகளுக்கு இலவச மின்சாரம் திட்டம் இதையெல்லாம் அறிவித்துவிட்டு, கடந்த 5 ஆண்டுகளில் வேளாண் நிதிநிலை அறிக்கை மூலமாக ரூ. 1 லட்சத்து 96 ஆயிரம் கோடி ஒதுக்கீடு செய்துள்ளனா்.

மாணவா்கள், விவசாயிகள், மீனவா்கள், அரசு ஊழியா்கள் என அனைத்து தரப்பினருக்கும் திட்டங்களையும் முன்னெடுத்து செயல்படுத்தி வருகிறாா் முதல்வா் மு.க.ஸ்டாலின்.

சாத்தான்குளம் தந்தை மகன் கொலை வழக்கில் நீதிமன்றம் தண்டனை வழங்கியுள்ளது. இப்படிதான் தண்டனை வழங்க வேண்டும்.

விளாத்திகுளம் வேடநத்தம் கிராமத்தில் பள்ளி மாணவி கொலை வழக்கில் கைது செய்யப்பட்டுள்ள குற்றாவளி மீது ஏற்கனவே பல்வேறு வழக்குகள் நிலுவையில் இருக்கும் போது ஜாமீன் வழங்கியுள்ளனா். இதுபோன்றவா்களுக்கு ஜாமீன் வழங்கக் கூடாது.

குற்றவாளிகளுக்கு வாழ்நாள் சிறை என்ற புதிய சட்டம் கொண்டு வர வேண்டும். அப்படிப்பட்ட சட்டங்கள் வந்தால்தான் பெண்களை பாதுகாக்க முடியும்.

200-க்கும் மேற்பட்ட தொகுதியில் திமுக கூட்டணி வெற்றி பெறும். கூட்டணி ஆட்சிக்கு இடம் இருக்காது. பெரும்பான்மையுடன் திமுக ஆட்சி அமைக்க வேண்டும். அதற்கு மக்கள் திமுகவிற்கு வாக்களிக்க வேண்டும்.

என்னுடைய காரை தோ்தல் பறக்கும் படையினா் சோதனை செய்தனா். முதல்வா் வாகனத்தை சோதனை செய்யும் தோ்தல் பறக்கும் படையினா் பிரதமா் நரேந்திர மோடி, உள்துறை அமைச்சா் அமித் ஷா காரை சோதனை செய்வாா்களா? சோதிக்கின்ற தைரியம் உண்டா..?

மத்தியில் இருக்கும் அதிகாரத்தை கொண்டு தமிழகத்தை வளைத்து விடலாம் என்று நினைத்தால் அது பகல் கனவாகிவிடும். ஒரு காலமும் நடக்காது என்றாா் அவா்.

கூட்டத்தில் கயத்தாறு ஊராட்சி ஒன்றிய முன்னாள் தலைவா் எஸ். வி.எஸ்.பி. மாணிக்கராஜா, மதிமுக வடக்கு மாவட்டச் செயலா் ஆா். எஸ். ரமேஷ், கட்சியின் ஒழுங்கு நடவடிக்கை குழு உறுப்பினா் விநாயகா ஜி. ரமேஷ், காங்கிரஸ் வடக்கு மாவட்டத் தலைவா் பெருமாள்சாமி, விசிக மாவட்டச் செயலா் முருகன், தேமுதிக மாவட்டச் செயலா் சுரேஷ் என்ற சுப்பையா, சிபிஎம் நகரச் செயலா் சீனிவாசன், சிபிஐ நகரச் செயலா் செந்தில் ஆறுமுகம் மற்றும் கூட்டணி கட்சியினா் திரளானோா் கலந்து கொண்டனா்.