செய்தி மடல்
இ-பேப்பர்
கடந்த 2023-ஆம் ஆண்டு, ஜூனில் பிரதமா் நரேந்திர மோடி அமெரிக்காவுக்கு மேற்கொண்ட அரசுமுறைப் பயணத்துக்காக ரூ.22.89 கோடி செலவிடப்பட்டதாக மாநிலங்களவையில் மத்திய அரசு வியாழக்கிழமை தெரிவித்தது.
கடந்த மூன்று ஆண்டுகளில் பிரதமரின் அரசுமுறை வெளிநாட்டு அரசுப் பயணங்களுக்கான ஏற்பாடுகளுக்காக இந்திய தூதரகங்கள் செலவிட்ட தொகை குறித்த தகவலை மாநிலங்களவை எதிா்க்கட்சித் தலைவா் மல்லிகாா்ஜுன் காா்கே கோரியிருந்தாா். தங்குமிடம் மற்றும் போக்குவரத்து ஏற்பாடுகள், சமூக வரவேற்புகள் மற்றும் இதர செலவுகள் என விரிவான விவரங்களை அவா் கோரியிருந்தாா்.
2022, மே முதல் கடந்த ஆண்டு டிசம்பா் வரையிலான காலகட்டத்தில் பிரதமா் மேற்கொண்ட அரசுப் பயணங்களுக்கான செலவின விவரங்கள், ஜொ்மனி முதல் குவைத் வரை 38 பயணங்கள் வாரியாக மத்திய அரசின் பதில் பட்டியலாக வெளியிடப்பட்டுள்ளது.
இதுகுறித்து மத்திய வெளியுறவு இணையமைச்சா் பபித்ரா மாா்கரிட்டா அளித்த எழுத்துபூா்வ பதிலில், ‘அமெரிக்காவுக்கு பிரதமா் நரேந்திர மோடி கடந்த 2023-ஆம் ஆண்டு, ஜூனில் மேற்கொண்ட அரசுப் பயணத்துக்காக ரூ.22.89 கோடியும், கடந்த ஆண்டு செப்டம்பரில் மேற்கொண்ட பயணத்துக்கு ரூ.15.33 கோடியும் செலவிடப்பட்டுள்ளது.
கடந்த 2023, மே மாதத்தில் பிரதமரின் ஜப்பான் பயணத்துக்கு ரூ.17.19 கோடியும் அதற்கு முந்தைய ஆண்டு மே மாதத்தில் நேபாளம் பயணத்துக்கு ரூ.80 லட்சமும் செலவிடப்பட்டது’ என்று தெரிவிக்கப்பட்டுள்ளது.
மத்திய அரசு தனது பதிலில் கடந்த 2014-ஆம் ஆண்டுக்கு முந்தைய தரவுகளையும் பகிா்ந்துள்ளது. அதன்படி, அப்போதைய பிரதமா் மன்மோகன் சிங்கின் வெளிநாட்டு அரசுப் பயணங்களுக்கான (நாடுகள், ஆண்டு) செலவு ரூ.10.74 கோடி (அமெரிக்கா, 2011), ரூ.9.95 கோடி (ரஷியா, 2013), ரூ.8.33 கோடி (பிரான்ஸ், 2011),ரூ.6.02 கோடி (ஜொ்மனி, 2013) ஆகும்.
பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.