சதுரகிரி வரும் பக்தர்கள் தங்க சமுதாயக் கூடம் அமைத்துத் தர முதல்வருக்கு கோரிக்கை

ஸ்ரீவில்லிபுத்தூர்.தமிழகத்தில் புகழ்பெற்ற சதுரகிரி சுந்தரமகாலிங்கம் கோவிலுக்கு வரும் ஆயிரக்கணக்கான பக்தர்கள் தங்குவதற்கு தமிழக அரசு சமுதாயக் கூடம் அமைத்துத் தர வேண்டும் என்று தமிழ்நாடு அரசுப் பணியாளர்கள் சங்கத்தின் மாவட்டத் தலைவரும், தமிழ்நாடு பேரூராட்சி பணியாளர்கள் சங்க மாநில துணைத் தலைவருமான ஆ.காமராஜ் கேட்டுக் கொண்டுள்ளார்.

இது குறித்து தமிழக முதல்வர் ஜெயலலிதாவிற்கு வியாழக்கிழமை அவர் அனுப்பியுள்ள கோரிக்கை மனு விவரம்: விருதுநகர் மற்றும் மதுரை மாவட்டத்தில் அமைந்துள்ள சதுரகிரி சுந்தரமகாலிங்கம் கோவிலுக்கு தமிழக முதல்வர் ஜெயலலிதா ரூ.8 கோடி ஒதுக்கீடு செய்து வனத்துறை மூலம் தற்போது சிறிய பாலங்கள் கட்டும் பணி நடைபெற்று வருகிறது.

ஆடி அமாவாசைக்கு நாட்டின் பல்வேறு பகுதிகளில் இருந்தும் லட்சக்கணக்கான பக்தர்கள் தாணிப்பாறை வழியாக சதுரகிரி மலைக்கு வந்து சுவாமி தரிசனம் செய்வார்கள். மேலும் அனைத்து மாதங்களிலும் சிறப்பு நாட்களில் ஏராளமான பக்தர்கள் இங்கு வந்து சுவாமி தரிசனம் செய்து செல்கிறார்கள். இப் பகுதியில் திடீரென மழை பெய்துவிட்டாலோ, அதிக வெயிலில் சற்று ஓய்வு எடுத்துச் செல்லவோ இடம் கிடையாது. எனவே சுமார் 10 ஆயிரம் பேர் தங்குவதற்கு வசதியாக தாணிப்பாறை, மந்தித்தோப்பு, வண்டிப்பண்ணை பகுதியில் சமுதாயக் கூடம் கட்டித் தர வேண்டும்.

மேலும் திடீர் மழையினால் பக்தர்கள் பாதிக்கப்படாவண்ணம் குதிரை ஊற்று, சங்கிலிப்பாறை, நாவல் ஊற்று, பிளாவடி கருப்பசாமி கோவில் பகுதிகளில் பாலங்கள் அமைத்துத் தர வேண்டும்.பக்தர்களின் பாதுகாப்பிற்காக தணிப்பாறையில் நிரந்தரமாக காவல் நிலையம் அமைக்க வேண்டும் என காமராஜ் அம் மனுவில் கோரிக்கை விடுத்துள்ளார்.