டி20 உலகக் கோப்பை: இங்கிலாந்து அணி அறிவிப்பு, பிரபல வீரர் நீக்கம்!

டி20 உலகக் கோப்பைப் போட்டிக்கான இங்கிலாந்து அணி இன்று அறிவிக்கப்பட்டுள்ளது. 

அக்டோபர் 16 முதல் நவம்பர் 13 வரை 2022 டி20 உலகக் கோப்பைப் போட்டி ஆஸ்திரேலியாவில் நடைபெறுகிறது. மொத்தமாக 45 ஆட்டங்கள் அடிலெய்ட், பிரிஸ்பேன், கீலாங், ஹோபர்ட், மெல்போர்ன், பெர்த், சிட்னி நகரங்களில் நடைபெறவுள்ளன. நவம்பர் 9, 10 தேதிகளில் அரையிறுதி ஆட்டங்கள் சிட்னி, அடிலெய்டில் நடைபெறவுள்ளன. இறுதிச்சுற்று ஆட்டம் மெல்போர்ன் மைதானத்தில் நடைபெறுகிறது. பிரதான சுற்றின் முதல் ஆட்டத்தில் அக்டோபர் 22 அன்று சிட்னியில் ஆஸ்திரேலியா - நியூசிலாந்து அணிகளும் அக்டோபர் 23 அன்று மெல்போர்னில் இந்தியாவும் பாகிஸ்தானும் மோதவுள்ளன.

இந்நிலையில் டி20 உலகக் கோப்பை, பாகிஸ்தானுக்கு எதிரான டி20 தொடர் ஆகியவற்றுக்கான இங்கிலாந்து அணி இன்று அறிவிக்கப்பட்டுள்ளது. சமீபகாலமாக சுமாராக விளையாடி வரும் ஜேசன் ராய், இங்கிலாந்து டி20 அணியிலிருந்து நீக்கப்பட்டுள்ளார். இந்த வருடம் ஸ்டோக்ஸ், வுட், வோக்ஸ் ஆகிய மூவரும் ஒரு டி20 ஆட்டத்திலும் விளையாடாமல் போனாலும் அவர்கள் மீது நம்பிக்கை வைத்து உலகக் கோப்பைக்குத் தேர்வு செய்துள்ளது இங்கிலாந்து கிரிக்கெட் வாரியம். 

அக்டோபர் 22 அன்று பெர்த் மைதானத்தில் தனது முதல் ஆட்டத்தில் ஆப்கானிஸ்தானை எதிர்கொள்கிறது இங்கிலாந்து அணி. 17 வருடங்களுக்குப் பிறகு பாகிஸ்தானுக்குச் சுற்றுப்பயணம் செய்யும் இங்கிலாந்து அணி 7 டி20 ஆட்டங்கள் கொண்ட தொடரில் பங்கேற்கிறது. டி20 தொடர் செப்டம்பர் 20-ல் தொடங்கி அக்டோபர் 2-ல் முடிவடைகிறது. முதல் நான்கு ஆட்டங்கள் கராச்சியிலும் கடைசி மூன்று ஆட்டங்கள் லாகூரிலும் நடைபெறவுள்ளன. இந்தத் தொடரை முடித்துவிட்டு டி20 உலகக் கோப்பையில் விளையாட ஆஸ்திரேலியாவுக்குச் செல்கிறது இங்கிலாந்து அணி. டிசம்பரில் பாகிஸ்தானில் 3 டெஸ்டுகள் கொண்ட டெஸ்ட் தொடரிலும் இங்கிலாந்து விளையாடவுள்ளது.      

உலகக் கோப்பைக்கான இங்கிலாந்து அணி

ஜாஸ் பட்லர் (கேப்டன்), மொயீன் அலி, ஜானி பேர்ஸ்டோ, ஹாரி புரூக், சாம் கரண், கிறிஸ் ஜார்டன், லியம் லிவிங்ஸ்டன், டேவிட் மலான், அடில் ரஷித், பில் சால்ட், பென் ஸ்டோக்ஸ், ரீஸ் டாப்லி, டேவிட் வில்லி, கிறிஸ் வோக்ஸ், மார்க் வுட்.

மாற்று வீரர்கள்: லியம் டாசன், ரிச்சர்ட் கிளீசன், டைமல் மில்ஸ்

பாகிஸ்தான் டி20 தொடருக்கான இங்கிலாந்து அணி

ஜாஸ் பட்லர் (கேப்டன்), மொயீன் அலி, ஹாரி புரூக், ஜார்டன் காக்ஸ், சாம் கரண், பென் டக்கட், லியம் டாசன், ரிச்சர்ட் கிளீசன், டாம் ஹெல்ம், வில் ஜேக்ஸ், டேவிட் மலான், அடில் ரஷித், பில் சால்ட், ஆலி ஸ்டோன், ரீஸ் டாப்லி, டேவிட் வில்லி, கிறிஸ் வோக்ஸ், லூக் வுட், மார்க் வுட்.