ஒலிம்பிக் மற்றும் உலக சாம்பியனான இந்தியாவின் நீரஜ் சோப்ராவை அவரது சாதனைகளுக்காக ஸ்விட்சர்லாந்து நாட்டின் சுற்றுலாத் துறை பாராட்டியுள்ளது.
ஸ்விட்சர்லாந்து நாட்டின் நட்புறவு தூதராக ஈட்டி எறிதல் வீரர் நீரஜ் சோப்ரா செயல்பட்டு வருகிறார். அவர் அண்மையில் ஹங்கேரியின் புடாபெஸ்ட் நகரில் நடைபெற்ற உலக சாம்பியன்ஷிப் போட்டியில் தங்கம் வென்றார். இதன்மூலம், ஒலிம்பிக் மற்றும் உலக சாம்பியன்ஷிப் போட்டிகளில் தங்கம் வென்ற மூன்றாவது ஈட்டி எறிதல் வீரர் என்ற சாதனையையும் படைத்தார்.
இந்த நிலையில், ஒலிம்பிக் மற்றும் உலக சாம்பியனான இந்தியாவின் நீரஜ் சோப்ராவை அவரது சாதனைகளுக்காக ஸ்விட்சர்லாந்து நாட்டின் சுற்றுலாத் துறை பாராட்டியுள்ளது முக்கியத்துவம் பெறுகிறது.
இது தொடர்பாக ஸ்விட்சர்லாந்து சுற்றுலாத் துறை சார்பில் கூறியதாவது: இந்தியாவின் சிறந்த ஈட்டி எறிதல் வீரரான நீரஜ் சோப்ராவை பாராட்டுவதில் நாங்கள் மிகுந்த பெருமையடைகிறோம். ஒட்டுமொத்த இளைய தலைமுறைக்கும் அவர் ஒரு சிறந்த உந்து சக்தியாக மாறியுள்ளார். அவர் ஸ்விட்சர்லாந்தின் நட்புறவு தூதராக இருப்பதில் நாங்கள் மிகுந்த மகிழ்ச்சியடைகிறோம். உலக சாம்பியன்ஷிப் போட்டியில் அவரது வெற்றிக்கு எங்களது வாழ்த்துகளை தெரிவித்துக் கொள்வதுடன், எதிர்காலத்தில் வரவிருக்கும் போட்டிகளிலும் சிறப்பாக செயல்பட வாழ்த்துகிறோம் என்றனர்.