இடைநிலை ஆசிரியா்கள் சாலை மறியல் போராட்டம்: சென்னையில் போக்குவரத்து கடும் பாதிப்பு

‘சம வேலைக்கு சம ஊதியம்’ என்ற கோரிக்கையை வலியுறுத்தி இடைநிலை ஆசிரியா்கள் சென்னை மெரீனா காமராஜா் சாலை, எழிலகம் உள்ளிட்ட இடங்களில் நான்காம் நாளாக திங்கள்கிழமை மறியல் போராட்டத்தில் ஈடுபட்டதால், அந்தப் பகுதிகளில் போக்குவரத்து கடுமையாக பாதிக்கப்பட்டது. இந்த போராட்டத்தில் பல ஆசிரியா்கள் மயக்கமடைந்தனா்

தமிழகத்தில் அரசுப் பள்ளிகளில் 2009 மே 31-ஆம் தேதி நியமிக்கப்பட்ட அரசுப் பள்ளி இடைநிலை ஆசிரியா்களுக்கு ஒரு ஊதியமும், அதே ஆண்டு ஜூன் 1-இல் பணி நியமனம் செய்யப்பட்ட ஆசிரியா்களுக்கு மற்றொரு ஊதியமும் நிா்ணயிக்கப்பட்டுள்ளது. ஒருநாள் வித்தியாசத்தில் அடிப்படை ஊதியத்தில் ரூ.3,170 குறைந்துள்ளது. இதனால் சுமாா் 20 ஆயிரம் ஆசிரியா்கள் பாதிக்கப்பட்டுள்ளனா். இந்த முரண்பாட்டை களைந்து சம வேலைக்கு சம ஊதியம் வழங்க இடைநிலை ஆசிரியா்கள் நீண்டகாலமாக வலியுறுத்தி வருகின்றனா். தமிழக அரசு இந்த கோரிக்கையை இதுவரை ஏற்கவில்லை.

இந்நிலையில் சம வேலைக்கு சம ஊதியம் கோரிக்கையை முன்வைத்து இடைநிலை பதிவுமூப்பு ஆசிரியா் இயக்கம்(எஸ்எஸ்டிஏ) சாா்பில் கடந்த டிச. 26 முதல் தொடா் போராட்டம் நடத்தப்பட்டு வருகிறது. அதைத் தொடா்ந்து நான்காவது நாளாக சனிக்கிழமை சென்னை காமராஜா் சாலையில் உள்ள எழிலகத்தையும், நுங்கம்பாக்கம் பேராசிரியா் அன்பழகன் கல்வி வளாகத்தையும் (டிபிஐ) முற்றுகையிட்டு போராட்டம் நடத்தினா். டிபிஐ வளாகத்தை முற்றுகையிட முயன்ற ஆசிரியா்களை, போலீஸாா் தடுத்து நிறுத்தி கைது செய்தனா்.

அதேபோல், மெரீனாவில் உழைப்பாளா் சிலை அருகே கூடிய ஏராளமான ஆசிரியா்கள், எழிலகத்தை நோக்கி கோரிக்கை பதாகைகளை ஏந்தி பேரணியாக சென்றனா். இந்த போராட்டத்தில் ஆசிரியா்களின் குழந்தைகள் உள்பட குடும்பத்தினரும் பங்கேற்றனா். அனுமதி இல்லாமல் சென்ால் போலீஸாா் அவா்களை தடுத்து நிறுத்தினா். இதனால் காமராஜா் சாலையில் அமா்ந்து போராட்டம் நடத்தியதால் அங்கு பரபரப்பு ஏற்பட்டது.

ஆசிரியா்கள் மயக்கம்: அதன்பின் ஆசிரியா்களை போலீஸாா் கைது செய்தனா். அப்போது ஏற்பட்ட தள்ளுமுள்ளு காரணமாக சில ஆசிரியா்களுக்கு லேசான காயமும், மயக்கமும் ஏற்பட்டது. மயக்கமடைந்த ஆசிரியா்கள், அருகில் உள்ள அரசு மருத்துவமனையில் சிகிச்சைக்காக சோ்க்கப்பட்டனா். கைது நடவடிக்கையை புகைப்படம் எடுக்க முயன்ற ஆசிரியா்களின் கைப்பேசிகளை போலீஸாா் பறித்துக் கொண்டனா்.

இடைநிலை ஆசிரியா்கள் ஏராளமானோா் காமராஜா் சாலையில் திடீரென போராட்டம் நடத்தியதால், அங்கு கடும் போக்குவரத்து பாதிப்பு ஏற்பட்டது. இதனால் இரண்டு கிலோ மீட்டருக்கு வாகனங்கள் அணிவகுத்து நின்றன. இதையடுத்து வாகனங்கள் மாற்றுப்பாதையில் அனுப்பப்பட்டன. இதனிடையே, கோரிக்கை நிறைவேறும் வரை போராட்டம் தொடரும் என்று இடைநிலை ஆசிரியா்கள் அறிவித்துள்ளனா்.