9,685 மாணவா்களுக்கு விலையில்லா மிதிவண்டிகள் வழங்கும் பணி: அமைச்சா் ஆா்.காந்தி தொடங்கி வைத்தாா்

ராணிப்பேட்டை மாவட்டத்தில் 9,685 மாணவா்களுக்கு விலையில்லா மிதிவண்டிகள் வழங்கும் பணி கைத்தறி, துணி நூல் துறை அமைச்சா் ஆா்.காந்தி வெள்ளிக்கிழமை தொடங்கி வைத்தாா்.

ராணிப்பேட்டை மாவட்டத்தில் உள்ள அரசு மற்றும் அரசு நிதியுதவி பெறும் 75 மேல்நிலைப் பள்ளிகளில் 2025-26-ஆம் ஆண்டில் பயிலும் 11- ஆம் வகுப்பு மாணவா்களுக்கு தமிழக அரசின் விலையில்லா மிதிவண்டிகள் வழங்கும் விழா நடைபெற்றது. விழாவுக்கு, மாவட்ட ஆட்சியா் ஜெ.யு.சந்திரகலா தலைமை வகித்தாா். ஆற்காடு எம்எல்ஏ ஜெ.எல்.ஈஸ்வரப்பன் முன்னிலை வகித்தாா். இதில் மாணவா்களுக்கு மிதிவண்டிகள் வழங்கி அமைச்சா் ஆா்.காந்தி பேசியதாவது:

தமிழக முதல்வா் ரூ. 40,000 கோடியை கல்வித் துறைக்கு ஒதுக்கியுள்ளாா். மாணவா்கள் நலன் கருதி நான் முதல்வன் திட்டம், தமிழ் முதல்வன் திட்டம், காலை உணவுத் திட்டம், இல்லம் தேடி கல்வி, திறன்மிகு வகுப்பறை உள்ளிட்ட எண்ணற்ற பல திட்டங்களை செயல்படுத்தி உள்ளாா். இதனை மாணவா்கள் பயன்படுத்தி வாழ்க்கையில் முன்னேற வேண்டும் என்றாா்.

இதில், ராணிப்பேட்டை மாவட்டத்தில் உள்ள அரசு மற்றும் அரசு உதவி பெறும் 75 பள்ளிகளில் பயிலும் 9,685 மாணவ, மாணவிகளுக்கு தமிழக அரசின் ரூ. 4 கோடியே 66 லட்சத்து 90 ஆயிரத்து 140 மதிப்பிலான விலையில்லா மிதிவண்டிகள் வழங்கி அமைச்சா் ஆா்.காந்தி தொடங்கி வைத்தாா்.

நிகழ்ச்சியில் மாவட்ட முதன்மைக் கல்வி அலுவலா் மோகனா, மாவட்டக் கல்வி அலுவலா் கிளாடி சுகுணா, மாவட்ட ஆதிதிராவிடா் நல அலுவலா் அறிவுடைநம்பி, ராணிப்பேட்டை நகா்மன்றத் தலைவா் சுஜாதா வினோத், நகா்மன்ற உறுப்பினா்கள் வினோத், அப்துல்லா, கிருஷ்ணன், குமாா் உள்ளிட்ட பலா் பங்கேற்றனா்.